【銅鑼灣】無綫早前黃金時段收視麻麻，加上王維基嘅聲勢浩大，喺內憂外患下，終於搵咗曾志偉首度監製劇集《Aerobic Girls》（暫名《舞室保衛戰》），故事改編自韓國電影《陽光姊妹淘》，不過最令人期待嘅係搵咗一班八、九十年代嘅影視界女神助陣，計有李麗珍、葉蘊儀，同久違嘅李若彤同張慧儀。
前日一班前女神就集合埋一齊開咗個記者會宣佈消息，當日下晝兩點幾，完咗記者會之後，有份演出嘅江欣燕揸住佢架Mini Cooper車埋張慧儀走，不過一上車江欣燕已經煙癮起，二話不說就點咗支煙。佢哋駛咗去銅鑼灣泊低架車後，就行咗上翡翠明珠廣場嘅一間餐廳坐低，而志偉啱啱喺門口出席緊記者會。
志偉加入戰團
大概30分鐘之後，李麗珍同葉蘊儀都相繼嚟到，睇嚟佢哋應該係想喺套劇開拍之前，自己開會度橋。不過佢哋幾位女士開頭似閒話家常多過似傾正經事，直到志偉完成門口嘅記者會加入戰團，成班人至認真咁提出意見，最後見餐廳開始多人，佢哋轉移陣地入咗餐廳嘅貴賓房繼續，一直傾到5點幾至各自離開。相信咁耐冇拍劇嘅珍妹同張慧儀，一定好重視呢套出山之作。
採訪、攝影：吳耀輝、楊浩賢、陳辰
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange