男女畢竟有別：人魚線，是男人練的；女生要拼，可以拼事業線，或者今夏流行的馬甲線。
兩種線都很好。只是事業線多靠天生，馬甲線有得練有得keep，多勞多得。
健康性感跟普通性感的分別：有馬甲線的女人，令同性羨慕又妒忌，會帶動姊妹淘一起keep fit渴望看齊；事業線露得多的女人，通常冇乜女仔朋友。
夏天，大地需要雨水、美腿和馬甲線，女士們來一起努力吧。
記者：劉嘉蕙
攝影：潘志恆、陳永威
模特兒：Hildy@Portamento People
化妝：Jimigo Pang
裝假甲勁Easy
近看空中瑜伽導師Amy，全身無多餘贅肉，一條小蠻腰加標準馬甲線，羨煞旁人。沒想到三幾年前，Amy也是肚脹脹的OL，經常周身痠痛，「我天生脊椎比較弱，返寫字樓工十幾年，慢慢發覺坐着痛、拎手袋又痛，脊椎好似俾針拮。醫生話我脊椎老化，椎間盆好乾，承受不到身體重量，弧度亦不夠。脊椎的作用是幫身體卸力，少了這一重，令我肌肉經常繃緊，勁做按摩都冇用。」天生體質問題，醫生話冇得解，Amy惟有四處尋訪另類療法，三年前遇上空中瑜伽，練習一陣子後，脊椎問題不藥而癒！「空中瑜伽跟地板瑜伽最大不同，是可以借助地心吸力拉筋，有助深層筋腱伸展。而懸空倒吊動作，更可以幫助血液運行；繩索勒住經脈，有通淋巴去水腫作用。好多初學者分享，倒吊完腦充血好high，好似浸完溫泉。其實經脈一經打通，成個人就自然拉番正。」
中碼變加細碼
療效顯著，令Amy決心轉行，投身瑜伽導師行列。過程中的意外收穫，是身形大為改善，「做空中瑜伽前，我102磅，着細碼衫、中碼褲。𠵱家我108磅，但衫褲都着加細碼，尺寸收緊晒，身體承托力亦好得多。以前我雖然瘦，但肚部好脹，腰部呈一直線。其實男男女女，不要一味追求瘦，要健康，有少少線條先好睇。」Amy大方分享。
即使自問腰椎冇問題、「行得正企得正」，抱住操馬甲線心態練空中瑜伽，成效也事半功倍，「當你個人懸浮半空，冇地方畀你借力，就一定要依賴腹部完成上落動作，所以成個腹都會練到。」Amy表演完一連串媲美湯馬斯全旋的空中動作後，特別叫我摸摸肚皮，果然滾滾發燙！
DIY 馬甲線
Model實試壯腹式
其實空中瑜伽大部份動作都從傳統哈達瑜伽（Hatha Yoga）轉換過來，並不難學。零瑜伽經驗的model Hildy即場試，在Amy輔導下，三兩下手勢Hildy已做出倒吊動作，冇底子都可輕易學會。
Facebook： http://www.facebook.com/Amyogalife
Blog： http://blog.yahoo.com/amyyoga
TRX吊腳操馬甲
女士練馬甲線，通常只有自閉在家做sit up一途；就算畀錢做gym，亦甚少揀練腹器材來用，皆因健身器材部部咁重型，坐上去好大壓力！想有點變化，可以試在美國大熱的TRX（Total Body Resistance Exercise/懸垂式全身阻力訓練）。工具只有一組配有手柄的尼龍帶，輕巧易藏，掛上房門都可以練。對比做sit up，TRX好處是加強阻力，有利訓練肌肉穩定性，成效顯著，「在平地做sit up，很容易會借了其他力，但吊了上去，不能做其他多餘動作，你只可以靠腹力平衡身體。」My Fitness Gym & Studio訓練課程總監Ivan說。TRX訓練看似輕鬆，但model一試玩，即大呼吃力！
My Fitness Gym & Studio（電話：2180 7253）
Facebook： http://www.facebook.com/MyFitnessgroup
終極
肚皮馬甲舞
成功練出馬甲線，想再下一城，可以練馬甲舞──你沒有看錯，你個肚，原來識跳舞，看Amy示範，形似有小怪物入侵腹部，識喊識笑有表情，超詭異。
「馬甲舞」一名是我生安白造，這套腹部瑜伽動作，名為Nauli，系出哈達瑜伽，屬深造級別，一般瑜伽學校很少教，Amy就花了兩年才學識。練Nauli，據說有清腸作用，將腹部內臟完完整整清理一趟。
當人魚戀上馬甲
童話故事人魚公主戀上凡間王子，最終化成泡沫，真實世界的人魚戀愛故事，好彩正正常常：故事發生在19年前的拉丁美洲哥倫比亞，「人魚男」Andres 17歲就入行成為健身教練，當時才16歲的Xiomara一心想操弗做索女，揀了全健身室最有型的Andres的班來上，一見鍾情，「我好瘋狂，Andres教幾多堂，我就上足幾多堂，放學撩佢傾偈。」
數星期後二人撻着，後來女方大學畢業後也入行教健身，拖友變成行家，再黐埋過香港打天下，眨眼快廿年，「你問我點解咁多學生入面睇中Xiomara，噢，佢優點一大籮，但我覺得最大原因我解釋唔到，愛情邊有得解嘅啫？」Andres提起Xiomara同樣一副冧樣。
越多人望我老婆越開心
人魚男與馬甲女談戀愛有個好處：食飯不用就來就去，不會一個叫走油另一個叫冇癮；拍拖活動是繼續健身，「佢勁啲，一日操5粒鐘，我負責叫佢放鬆吓。」Xiomara說。二人教健身班，日日面對大把年輕型男索女，冇呷醋過？香港男人娶得索老婆，第一件事是收埋屋企，出街包到實唔俾人望，「我唔會喎，我老竇同我講，有人望你老婆，代表佢靚，係你嘅光榮，越多人望我越開心。其實你想老婆開心，就要鼓勵佢扮靚做運動，健康好心情靚，一段關係先會快樂長久！」
What is 馬甲線？
馬甲線指肋骨下方、肚臍兩側的肌肉線條；肋骨對下微凹、近肚臍位微凸，隱約浮現H字形。有線條之餘不失女性美。
Who got 馬甲線？
