楊過等姑姑16年，我哋唔使，只係等咗9年啫。講緊係「小龍女」李若彤嘛，佢自從04年拍完內地劇《大宋驚世傳奇》就冇拍劇，最近宣佈復出，參演曾志偉監製套新劇《Aerobic Girls》，戲份同李麗珍一樣咁重。養尊處優嘅姑姑不但冇發福，反而身形弗爆，點睇都唔似39歲，唔通佢同小龍女一樣唔會老？
消息傳出，網絡即時議論紛紛，原來大家最懷念嘅唔係《神鵰俠侶》，而係佢喺《大內密探零零發》入面飾演嗰位「姓琴，單名一個字操」嘅金國名妓。佢喺戲入面冇性感裝束、冇香艷鏡頭，只係求其畫條鬚跳隻舞玩滴蠟，已經令班宅男睇到咿嘩鬼叫，李力持仲急不及待要幫佢驗明正身……
李若彤之後返咗內地掘金，開始冇乜佢嘅消息，大家淨係記得佢同商人郭應泉拍拖，可惜喺09年分咗手，之後一直單身到𠵱家。
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！