武俠小說高手的至高境界，是能以氣馭劍，無堅不摧。
劉德華跟鄭秀文（Sammi）即使對上一次合作，已是八年前的事，但彼此那份默契浩氣長存，絲毫沒有陌生。就如武林高手彈指傷人，落葉飛花皆可為劍，不用任何演練。單看兩人在法國康城的合照，那份親暱及甜蜜配合得絲絲入扣，雖然明知各有所屬，閃念之間都曾懷疑過兩人的關係。
如Sammi所言跟華仔的火花無時無刻都存在，華仔更直截了當：「就算係床戲，攬住Sammi嘅感覺係唔同攬住其他女演員。」這句話未知是否適用於有「幸福抱抱」這招殺着的林志玲身上？
撰文：文國駿
劉德華與鄭秀文早前到法國康城影展宣傳新片《盲探》並接受本報專訪，由《孤男寡女》開始到之後的《瘦身男女》、《龍鳳鬥》，再到今次的《盲探》，已是二人在杜琪峯執導下第四次合作，雖然有八年時間沒交手，但他們異口同聲表示不覺過了這麼久，華仔說：「我真係唔覺有十年八年冇合作，可能喺冇合作呢八年，即使冇見到Sammi但係睇到佢啲嘢都會諗起佢，我真係一啲陌生感覺都冇，因為個感覺都冇離開過。」
Sammi亦表示再次合作拍電影是一件「好應該」的事，尤其這次《盲探》遇上杜琪峯團隊，讓她有大家庭一起去成就一部電影的感覺，更明言：「我同華仔無時無刻都有個click（火花）喺度。」
賤精華仔
華仔亦為這個「click」再去補充，他表示可能與Sammi已經太了解及有默契，所以跟其他女演員不會做的事情或表情，跟Sammi合作時也會自然地發生，他說：「拍戲時喺床上攬住Sammi同攬住其他女演員個感覺都係唔同，我哋嘅感情係一部一部咁建立，冇《孤男》我唔覺會有《龍鳳鬥》，同樣都未必有呢部《盲探》。」
談到二人在電影中的演繹方式非常奔放，甚至可以用誇張來形容，Sammi表示很喜歡這種誇張又帶喜劇感的演出方法，她說：「呢部電影巧妙嘅地方係佢以喜劇形式起咗個頭，之後先有好重戲味，而且故事結構好紮實，又畀我哋超越以前嘅搞笑方式，因為佢嘅場口設計可以畀我哋以更誇張嘅方式演戲，其實我都唔係好識形容呢部電影係乜片種，因好豐富乜元素都有，有認真、搞笑甚至好cult都有。」
華仔於戲中的角色被杜琪峯形容為非常賤格，他自己則覺得很寫實，華仔說：「我喺戲入面好賤㗎！因為佢當咗自己係生命入面嘅男主角，係以自己作為出發點嘅一個人，自自然然就會自私自我，呢啲情況喺現實生活中都時常搵到，係一個好真嘅人物。」
八婆Sammi
Sammi表示對電影中一場賭場戲份特別深刻，她於那場戲扮一名爛賭八婆，狂抽煙之餘說話大聲兼粗魯，她笑言：「我覺得嗰場戲好好玩，雖然NG唔多，但因為要拍唔同角度，所以要重複去做，我嗌到喉都沙晒，真係好開心有呢個角色，我覺得係一個新嘅自己，十幾年前我未必可以做到咁奔放，喺現場睇playback時我好高興，原來自己可以咁八婆！」
記得Sammi曾經為了一部《長恨歌》而患上情緒病，到近年有信仰後凡事也看開了，問到這轉變對她演戲可有影響？她坦言：「都會有影響㗎，因為做戲係要將心內一啲嘢放出嚟，喺一收一放之間做到平衡，以前可能會有啲唔敢放或者太緊張唔識放嘅地方，𠵱家就會容易啲，自然啲，冇咁繃緊。」
問到華仔對自己在電影圈多年的評價，他感恩表示：「我喺電影圈裏面生活得好好，大家都認為我係一個努力嘅小孩子，我覺得大家對我好好，一路畀好多唔同機會我。」近年華仔有以出品人身份投資電影，是否希望為電影界播種？華仔說：「有越嚟越多唔同世界出現，有80後甚至90後嘅導演、電影人，我自己都要一路追住，因為真係要有同一樣呼吸，先可以帶佢哋嚟呢個香港電影世界入面，呢條路要慢慢開墾，我想製造呢個空間畀啲新人。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange