九龍西有乜多？八方估計，老鼠一定唔少，否則大家唔會即時諗起鼠王芬。估唔到民建聯元秋蔣麗芸對選民咁「體貼」，佢透露稍後會坐住佢新落地嘅戰車，喺九西四出滅鼠。嘩，乜搞到大義滅「鼠」咁嚴重？話晒都係自己人，殘忍咗啲啩？
鼠王芬 諗計接招喇
秋同李慧琼嘅九西戰車，噚日正式落地，仲隆重其事喺立法會停車場舉行啟動禮，除咗民記主席譚耀宗，仲請到立法會主席曾鈺成親臨揭幕㖭。但上次喺元秋生日會上，錫錫呵番壽星女嘅曾主席，今次同元秋企到離行離列，唔再打情罵俏，莫非曾太呷醋，阿曾醒水覺得要收斂？
到底架戰車有乜任務？元秋話當係喺九西18個點周圍巡，希望一星期至少出動三日啦，重點地區都係民記冇辦事處嘅「吊腳」位喎。講講吓佢自爆，查實坐住戰車落區嘅時候，除咗派傳單宣傳之外，仲會專注區內嘅衞生問題，大搞滅鼠運動，仲話留意到深水埗後巷嘅鼠患特別嚴重，因為堆積咗好多建築廢料。吓，乜鼠王芬成日喺深水埗出沒㗎咩？八方真係冇留意，睇怕鼠王芬都要啲新招迎戰，否則唔使等到下屆，已經鼠無葬身之地咯。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange