一般地攤檔出現於「貧」友之都，天水圍、深水埗都有天光墟，但原來富人雲集的中環也有個黃昏墟，逢星期日及公眾假期傍晚時份，地攤檔湧入卑利街。天光墟買賣雙方都以長者為主，中環黃昏墟檔主則多為年輕女士甚至是學生妹；街坊、外籍傭工、遊客都到此尋寶，令市集顯得甚有異國風情。然而，近來食環署不滿地攤檔佔領中環，執法人員多次驅趕，商販、顧客異口同聲說：「畀條路行吓！」
記者：中環特工隊
中環金融業崗位向女性傾斜，年輕男士處於弱勢，就連卑利街地攤檔也陰盛陽衰，嬸嬸婆婆賣舊廚具電器，女學生、OL則出售二手衫褲袋鞋。
這天記者遇上三名中六女生擺地攤，其中陳同學家中舊衫堆積如山，苦無處理之法，一天途經卑利街，發現這個両妹地攤，既可減廢，又可賺幾個錢，她說：「都有好多衫拎出嚟㗎，我一個紙袋袋晒出嚟，我自己啦丶阿爸、阿媽同埋細佬妹嘅嘢都攞咗出嚟。」
一件衫5蚊 清舊物又環保
男人視老婆如衣服，女人則視舊衣服如同舊情人，不忍殺死，但也不想再見，另一名女同學說：「平時行街嘅時候都見到有地攤檔，自己買咗好多嘢，積埋又唔用，唔着好嘥，咁就攞出嚟擺地攤賣。啲衫就賣10蚊一件啦，最貴嗰件衫賣25蚊，最平賣5蚊。呢度最貴係個銀包，都係諗住賣30蚊，買返嚟嘅時候就幾百蚊。」家人亦支持她們賣衫，而且外國人和外傭不時講價，她們便用英語還價，就當免費練習。
別以為擺地攤是無收入人士的專利，Chunky和Sharon兩名廣告業女將過往在深水埗及維園擺檔，後來發現卑利街這片福地，於是轉戰中環。Chunky說：「覺得呢度好多人行啦！擺檔又唔使畀租。有好多地方，例如喺台灣、泰國都有人擺地攤，但香港就比較少，如果真係純粹擺地攤，淨係得深水埗，但假期時間好少有，呢條街好彩可以擺到。」
Chunky售賣自己的衫褲，叫價比女同學們稍高，最貴是一個袋，盛惠120元，「好多女仔同我自己一樣，一個禮拜買兩、三次衫，買完返嚟都係着一至兩次，咁如果喺呢度擺地攤，將自己着過又唔想再着嘅衫賣畀人，又或者人哋有更加好嘅嘢同我交換，其實係一個好好嘅環保概念」。
拍檔Sharon既是賣家，也是買家，曾在卑利街執到寶，「之前買咗一個茶壺，同埋一個陶瓷裝飾品，買嚟擺喺屋企做裝飾，如果之後唔鍾意，會嚟呢到賣番畀人，又或者係物換物同人交換」。
食環頻掃場 無阻顧客支持
好景不常，食環署連續五、六個星期跑到卑利街掃場，向地攤檔大叫：「你當我哋個個禮拜日收工呀！唔做呀！有牌嘅坐低，冇牌嘅即刻執嘢走！」Chunky坦言擔心，「有少少驚，都冇辦法，頭先都俾人掃過一次，香港就係咁㗎啦，太多限制，我覺得政府應該畀多啲機會人去做地攤。其實我哋擺地攤，都唔會阻啲人好犀利，甚至有啲遊客行過中環都覺得好有特色，可能會更加想嚟香港，可以做到一個本土嘅文化」。
一名女顧客呼籲政府執法從寬，例如每天讓商販擺賣兩小時，「支持呀！星期六、日擺都係好嘅，呢度有我想買嘅嘢，好抵呀！我買咗件衫都係20蚊。其實我做咗一個計劃，就係一年內唔會再買新衫，淨係買二手衫，又或者人哋唔要嘅衫畀我」。
中環爆料熱線
WhatsApp：9499 3777
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange