本欄月初推介金山軟件（3888），當時股價13.06元，與噚日收市價一樣，睇番期內恒指已插水9%，唔少個股跌到一仆一碌，更突顯其強勢。
大跌市有此表現得力三大因素︰首先，業績夠靚仔，集團首季盈利1.95億人仔，按年及按季分別增長124%及57%，年度化市盈率15.5倍未到，比龍頭騰訊（700）嘅26.5倍，折讓超過四成，上升空間大。其次，主席雷軍係國產手機小米創辦人，之前向騰訊購回部份股權，唔排除為注資鋪路，亦有內地傳媒指搜尋引擎一哥百度，有意入股金山，成事的話協同效應不可小覷。第三，阿里巴巴即將強勢上市，金山具備影子股概念。麥格理早前發報告，指網遊業務為集團提供強勁現金流，並調高其目標價至14元，維持跑贏大市評級。
睇圖表，金山4月以來一直守穩20日線之上，噚日下試該位後隨即彈上，反映支持力強，中線以20倍PE作目標，可見16.90元，潛在升幅29%。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange