近年無綫唔少劇集都俾觀眾同網民踢爆抄橋，好似啱啱播嘅《熟男有惑》俾網民話明抄張東健主演嘅韓劇《紳士的品格》，雖然係咁，但《熟男》首集收視相當唔錯，平均29點（約186萬觀眾），最高仲試過30點（約193萬觀眾），唔怪得劇中演員李思捷、郭晉安、單立文、李詩韻、王君馨同陳敏之率先慶功。
前晚一班藝員夾錢買咗29支啤酒，到中環蘭桂坊即場派畀市民，佢哋一出現即吸引唔少市民圍住影相，熟男安仔、李思捷同單立文果然有啲魅力，吸引唔少中女。不過班女都唔執輸，引嚟唔少外籍男士主動搭訕，果然係異性相吸。
逼女拍檔倒立
安仔話當晚行動係慶祝有29點收視，咁如果再高啲又有乜嘢搞作？安仔笑住話：「我哋幾個男嘅喺劇中已經有全裸演出，咁女仔都應該要做啲嘢，如果35點啲女仔就一於着背心短褲玩倒立。」但講到俾人話抄韓劇，安仔力撐：「我哋呢套有港劇味道，亦有美劇色彩同日劇音樂，另外更加有新加坡風味。唔好理抄唔抄，唔同人做有唔同感覺，我覺得我哋呢個組合幾新鮮開心。」
講到成功吸引中女，安仔笑住話：「我哋呢啲都幾吸女，結咗婚都有吸引力。」女仔都吸到外籍男士喎？敏之就話：「都開心㗎，證明有吸引力，靚女通常都有呢啲機會。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange