昨日同文提及有不少家長幫他們的寶貝子女搵暑期工，還親身帶個囡去見工。這種遭遇，又豈是個別情況。而我在此謹告，今年暑期實習（summer intern）的空缺已經額滿，所以各界友好，包括早前親自致電給我的那位內企吳總，明年請早。其實，過去幾年都不知婉拒了幾多「畀個機會世姪跟你學嘢」的請求，可以的話，連搵暑期工都要勞煩自己的叔伯父母，唔該你畀番個機會我，作為「上市公司主席」，我的職務範圍並不包括安排暑期工，懇請注意。
還請世姪「多多關照」
若然他朝有日你個囡真係嚟見工，想你該不會陪同結伴，否則的話，大家剛巧在接待處碰面，然後我唔知同你講乜好。雖然碰不上，亦請不必致電跟進，更毋須聲聲「關照」，事實我的職務範圍同樣不涉一般職級的招聘事宜，除非你啱啱畢業個囡家陣係應徵做CEO，若真的是這種頂尖人才，還是留在閣下自資經營（有的話）公司方能發光發熱。不過你也大可放心，貴子弟一旦入職，應該係佢「關照」番公司才是。
起碼，佢唔好做得嗰一頭半個月就話辛苦（邊份唔係？願聞其詳），又嫌冇嘢學（一心向學，學費先惠），跟住就辭職（whatsapp通知）唔撈，我們的人事部又得重新招聘，費時失事。
一個唔該，她可能還會在社交網站口出怨言，然後總有不少同輩友儕附和回應，還望不會輾轉流落到那些猶似堆填……該是「網上討論區」，又有一番擾攘折騰，咁就連傳訊部都驚動埋，真係多得佢嘅「關照」唔少。所以有時候，我倒寧願身為父母的親臨指正，怎由我們開風氣之先，施行最高（點只標準）工時，準時放工，謝絕超時，好讓子女早些返歸「御宅」。
同時貫徹本土主義，即係千祈咪派佢出差返內地，如非必要，最好都唔使過海。要求雖多（都唔知係邊個請邊個），都好過由得啲子姪在網絡世界亂咁發威。
講完，有冇咁誇？還不是切膚之痛，心有餘悸，方有感而發，當然仍盼是個別僱員事件。不過回想，以前的社會是人求事，每一個工作機會得來不易，況且經濟條件不如今日充裕，一人手停，搞不好要全家口停。每個勞動力都沒有「咁辛苦就咪做」、「不如再讀吓書先」、「唔鍾意咪搵過份囉」的本錢，最最最緊要係「層樓邊個供先？」，而「供」養父母的責任重大，其實不過就係要夾份「供」樓。今日青年漫無工作目的，與家庭都冇咗個共同奮鬥嘅目標，未必無因，起碼現在的父母豈敢同個仔一齊再玩換樓續供這個資產升值遊戲。
盧先亞
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange