本來踏入6月該屬球壇休季期，但這兩周有U21歐國盃同洲際國家盃，合共逾30場波，再加上NBA總決賽打足7場。咁多場波，可能周二場U21歐國盃決賽會較被忽略，但這場賽事卻甚具指標性，預示西班牙王朝，應該有排威！
上年意大利大國腳於歐國盃決賽，被西班牙橫掃4蛋，可能好多意軍擁躉都希望小國腳可以喺「小歐國盃」決賽報番一箭之仇；豈料再被徹底擊敗。不得不承認西國現在無論青訓以至人腳，都拋離同儕成條街。意大利、英格蘭等國家，常有大小國腳爭人情況，意軍便有艾沙拉維與巴洛迪利要踢洲際盃，削弱了U21陣容；但西班牙卻可派出兩支人腳全不重叠的大小國腳，分別出戰洲際盃與U21歐國盃，其人強馬壯程度可想而知。
再看看U21歐國盃決賽正選陣容，有多少球員已在主流聯賽站穩陣腳？意軍就只有拿玻里的恩斯治尼與法甲PSG馬高華拉堤等4、5人，整條防線更全是乙組仔；相反西軍決賽11人中，全部已屬西甲球隊主力，大部份更來自巴塞、馬體會、皇家蘇斯達等前列球隊。可見西國青訓出色，令球會願意起用新人；新人獲得上陣機會又加快成長，形成良性循環。看堤亞高艾簡達拿決賽的神勇表現，相信西國已不用為沙維年紀漸大而煩惱，而且還有進攻好手艾斯高、門神迪基亞等。大批小將升上大國腳後，西班牙實力還會弱嗎？
方柏翹
now足球評述員
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange