聯儲局議息後引發市場大恐慌，今次議息結果頗令人意外，在美國極低通脹之下，根本無迫切需要收水，而且世銀及國基會才剛調低全球經濟增長預測，照計經濟下行風險仍偏大，咁快講實明年中可能停止買債，絕對令市場意外。
睇番去年第四季至今的新興市場表現，就知道QE3後有唔少熱錢進入了新興市場股市及債市賺取息差。事實上三次QE的資金有不少都停泊在央行而非流入經濟實體，當中又有不少流到海外賺取息差，假如今次講明停止買債，市場已預期債息只升不跌，資金回流美國是肯定的。
料現價再跌一成
另一個意外是市場原先估計聯儲局會重申資產購買計劃是可加可減，即美國經濟下滑時仍可加碼買債。假如美國唔買債，債息上升將會成勢，資金則會由流出變回流美國，因此美元長遠趨勢是轉強，之前流出海外的資金，包括流到東南亞等新興市場的資金會回流美國。
印尼股市是現時最多大行睇淡的股市之一，原因是之前當地加息料會打擊經濟，同時印尼本身的基礎因素亦唔算特別強，受資金流出的影響特別大。印尼股市去年中由3800升至上月最高5200附近，升幅逾36%，呢次回調，若要抵銷QE3以後的升幅，睇怕都要回落至4200水平，現價仲有一成跌幅。
持有大量印尼及菲律賓資產的第一太平（142），股價恐仍有較大下跌空間。
歐陽風
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange