【中環歌賦街】用一戲接一戲嚟形容宇宙最強嘅甄子丹都冇乜講錯，佢剛完成《冰封俠3D》，跟住又要開工拍陳德森套《一個人的武林》，兩個人因為之前合作《十面埋伏》而成為好朋友，今次子丹係用友情價接戲㖭！前日子丹同一班演員楊采妮、白冰、吳浩康同姜大偉喺中環歌賦街一間出名賣番茄麵嘅大牌檔開工。
大約夜晚7點幾，一班工作人員喺大牌檔旁搭起另一個檔口，而大俠出身嘅姜大偉今次就扮大廚。劇情講述飾演警察嘅吳浩康同楊采妮，帶住殺人犯甄子丹去大牌檔食嘢，姜大偉就負責招呼佢哋。
父女扮外賣客
拍攝期間，一架寶馬房車駛到，落車嘅係嘉禾電影公司創辦人、86歲嘅鄒文懷，同佢個女鄒重衍。以為佢哋嚟探班，原來今次佢專程嚟客串扮買外賣嘅食客，導演仲安排咗個大頭鏡頭畀佢，為咗唔熱親老人家，導演陳德森快手快腳完成鄒文懷嘅戲份。鄒文懷離開時，一班工作人員好恭敬咁護住佢兩父女上車。
因為天氣熱，導演每次叫停，化妝師都要為子丹同白冰不停抹汗補妝，拍咗一個鐘左右，到咗放飯時間，着晒西裝嘅吳浩康同兩個工作人員去咗附近嘅餐廳唞涼同開餐，子丹就同楊采妮匿埋嘆冷氣。
採訪、攝影：徐錦池、楊浩賢
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange