聯儲局退市機會增加，但更致命係內地隔夜拆借利率曾經衝上30厘，銀行間借錢就嚟同向財仔借冇分別，令人回想起97年金融風暴，咪話唔驚。
論估值，原來H指市賬率跌到去1.12倍，距離海嘯低位1倍，只剩大約一成跌幅，即係H指跌多1,000點左右，以市賬率計就返去海嘯低位，可想而知市場幾咁悲觀。
承接近期講到H股指數技術分析，都係先講圖，再講宏觀形勢。H指醞釀月線圖MACD雙熊訊號，前所未見咁淡，其實睇埋周線圖，同樣有驚人發現，H指已經跌穿2011年10月至今嘅長方形，即係話中資股形勢已經差過歐債危機時。另外，H指舊年10月至今形成頭肩頂，已跌穿頸線接近1,000點，按量度跌幅要下試8110，情況極惡劣。不過，H指9周RSI跌到22.9，9日RSI見11.2，相等於2011年8月低位嘅超賣水平，亦有條件觸發反彈。買股長揸不宜，短線造淡亦風險重重，逼住要靠邊站，甚至短線寧願買股博反彈仲好過造淡。
逼阿爺出手 股市隨時彈
基本面方面，呢幾日內地傳出光銀對興業銀行成千億人民幣債務違約，嚇到大家鼻哥窿冇肉。如果光銀出事，出現雷曼式爆煲肯定會有連鎖反應，分分鐘隊冧金融系統，奇就奇在阿爺整頓影子銀行絕冇手軟，暫時好似驚都未驚過。
莫非背後有比光銀違約風險更大件事喺度發生，令市場咁驚？晉佳覺得都唔出奇，表面證供睇，市場係極憂慮內地影子銀行爆煲，令全部內銀都有可能出事，但阿爺𠵱家有錢到褲都着唔到咁滯，即使幾咁想搞掂影子銀行單嘢，但瀕臨爆煲，確實不可能見死不救。
如果大家相信影子銀行出事，同時又好似啲大行咁，估阿爺短期內唔會出手紓緩銀根或救市，晉佳就覺得有啲違反人性。
就咁睇嚟，政策市形成嘅股市反彈，絕對有機會隨時出現。同技術分析結論相若，如果覺得短線持有港股/中資股風險好高，短線造淡風險就更加高。
晉佳
本欄逢周一、三及五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange