孫柏文每次被邀去投資講座演講，都好鍾意問觀眾：「根據用來反映香港樓價、一個星期公佈一次嘅中原城市領先指數，大家知唔知97年樓市泡沫爆破後，喺邊個禮拜見底？」
我問呢個問題嘅原因，係因為我見好多股民日日話呢樣係「國策」，嗰樣係「國策」，不過又聽唔到政策背後嘅政治因素，甚至覺得炒股票炒樓睇政治嘥氣。呢個亦可能因為好多做財經評論嘅，唔想捲入政治討論。
例如03年發生咁多事，你捉住求其一個我呢啲財演問：「03年7.1遊行對香港好唔好？」真係唔會答。又或者問：「03年7月初圍立法會打倒廿三條立法，係咪件好事？」行家們，應該都係唔會直接答你。
樓價見底之時
究竟中原城市領先指數見底之周係幾時？就係喺廿三條立法擱置嘅嗰個禮拜。當時我連股票行都未入行，不過如果我當時有機會寫，就一定會話：「香港人咆哮了！聽話，不過都有底線！香港有救了！反映香港運勢嘅樓價，仲唔見底？」
當然，比我更稱職嘅財演就會話：「中央知道香港人要反啦！所以將會有一系列措施去安撫香港老百姓。招數一出，香港各行各業，特別係請人多嘅服務業將會受惠。」當然，睇番嗰幾日嘅財經評論，全部講香港以外嘅事。無他嘅，當時真係仲估香港玩完，因為喺廿三條立法擱置後嗰日，有巴士喺屯門公路墮橋，21人死。香港，真係似氣勢已盡。
咁03年，睇番轉頭，就令我記起聖經中世界滅亡之日，將會有四騎士降臨。代表死亡（張國榮、巴士失事）、戰爭（伊拉克）、瘟疫（沙士），唯一冇嘅就係最尾嗰個代表饑荒嘅騎士，即係very close，不過唔會世界滅亡。仲要樓價、股價price in咗apocalypse，咁仲唔係瞓身一注獨贏買嘢之機？
之後好多香港人都話：「神，可以賜我多一次沙士價嗎？」有冇呢？有，咁08年10月，你有冇瞓身入市呢？
孫柏文
獨立股評人
http://facebook.com/shuen
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange