經濟唔好，使錢少咗，好多消費品牌生意都唔太掂。不過「嘢可以唔食，靚唔可以唔扮」，女人錢始終易賺啲。
平日行街經過莎莎（178），都會見到好多少女、中女，甚至盛女入去朝聖，難怪過去幾年盈利都保持超過三成增長。
莎莎今日公佈截至3月底止全年業績，瑞信就發表報告指，相對其他消費品牌，莎莎銷售已經好強勁，不過預計第四季內地業務虧損嚴重，短期內都冇乜可能好轉，勢將拖累盈利表現，相信今年只可以多賺19%至8.21億元，唔能夠再維持三成升幅的往績。
不過瑞信依然鍾情莎莎，認為消費行業中，其銷售勢頭唔會差得去邊，前景應該可以保持穩定增長，但現價已經反映利好因素，故維持中性評級，建議回落至7.50元先入貨，上望8元。
瑞信：見7.5元可買
睇番走勢圖，舊年股市暢旺，莎莎當然一帆風順，單是下半年股價就升超過六成。踏入今年亂市時代，恒指迄今跌咗7%，但明顯跑贏大市，錄得近三成升幅，昨收8.20元，抗跌力的確唔錯。近日股價稍為回調，唔排除業績公佈後可能有短暫反彈，不過相信力度不大，加上面對自由行旅客消費力減弱，又需時改善內地業務，今年盈利表現都難復當年勇。想現價入貨博破頂的話，相信都唔係咁易。
瑪姬兒
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange