靚女冇拖拍總叫人嘖嘖稱奇，偏偏酒店界就有兩位靚女未搵到Mr.Right。一位係講咗好耐嘅富豪酒店（078）太子女羅寶文，另一位就係遠東集團創辦人邱德根嘅孫女邱詠筠（Winnie），Winnie有次去台中公幹，見到台中市市長，對方仲忍唔住要幫佢做媒人𠻹呀。
同曾蔭權細仔散咗
Winnie喺2011年底升任帝盛酒店（2266）總裁，曝光率逐漸增加，佢咁靚女，大家自然關心埋佢嘅感情生活。最為人所熟識，係佢曾經同前特首曾蔭權細仔曾慶淳拍拖，可惜最終未能開花結果，散咗，傳聞男方最近已有新歡。
33歲嘅Winnie仲後生，對感情事未係好着緊，噚日一齊食晏時自爆，過去六周四圍考察酒店業務，早排去到台中，台中市市長胡志強知道佢未有男友，竟然主動提議做媒人，話要介紹啲好男仔畀佢識，佢笑而不語。
自認飯桶 無米不歡
雖然話唔着緊拍拖，貪靚就一定嘅。話說正當大家埋位食緊飯嘅時候，有人突然想舉機影相，Winnie立即喊唔好。佢怕食相唔見得人，影低張相留底認真不得了，堅持要企靚靚先俾人影相。
講開又講，咪以為Winnie後生女，實掛住減肥唔食飯，佢原來係飯桶一名，餐餐都要有碗飯落肚先至得，佢仲要求帝盛旗下海外酒店一定要有白飯供應，唔可以只得粉麵，真係估佢唔到！
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange