蒙牛（2319）全購雅士利（1230），唔單止可以減少一個競爭對手，而收購價僅溢價5.1%，對蒙牛確係筍刁。
今次單刁明顯係工信部牽頭，以整合乳業市場。雖然賬面上，雅士利上年收入只係蒙牛一成，但規模一啲都唔細。據AC Nielsen數據，雅士利上年喺奶粉市場市佔排行第8，至於蒙牛，前10位都唔見影。
單刁公佈後，喺微博仲見到一眾內地網民仲話罷買雅士利奶粉。咁就證明就算蒙牛臭史多籮籮，甚至係明知雅士利較受消費者信賴，都阻止唔到蒙牛獲阿爺祝福，欽點呢隻國資背景嘅牛成為乳業霸主，踢走民企。
家陣阿爺明撐，而隻牛又表明會繼續物色收購，於「大食細」浪潮下，隻牛只會越做越大，對股東當然係好事，不過企喺消費者立場，「劣牛驅逐良牛」，跟手仲可以壟斷，獨步天下，產品質量差上加差嘅機會好大，到時中國十幾億人口，就算信唔過佢哋嘅產品，係冇得揀之下只有焗飲。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange