前皇馬教練基羅斯闊別歐洲幾年，估唔到佢寸咗咁多。呢位葡籍教頭𠵱家教緊伊朗，周二喺世盃外亞洲區10強賽擊敗南韓，打入決賽周。基羅斯又囂張又小器，真係幾乞人憎；但南韓教練崔康熙賽前大口氣話要踢走伊朗，𠵱家就差啲冇得晉級，自己又辭職，又真係抵俾人寸。
崔帥劈炮洪明甫或頂上
A組嘅南韓賽前拎多1分就肯定入決賽周，教練崔康熙講到明話好憎伊朗，一定會贏波，令佢哋冇得直接晉級。講完都冇兩日，南韓主場以0:1輸咗畀伊朗，丟架之餘，仲差啲冇得出線；最後只能靠得失球壓住烏茲別克，保住個第2名。見到南韓咁辳，基羅斯賽後寸到爆，除咗拎咗個A貨世盃出嚟慶祝之外，仲好好火咁走去南韓教練組前挑釁，做出侮辱性手勢，主場球迷當然即刻向伊朗職球員掟嘢還擊！在賽後記招上，基羅斯唔覺自己有錯，「崔康熙之前話要我喺屋企睇世盃，我好嬲呀，所以賽後咪走去佢面前慶祝。」最諷刺嘅係，崔康熙賽後請辭；原來下年要喺屋企睇波嘅係佢自己，傳聞將由鐵血後衞洪明甫接任新教練。
前銀河艦長腦殘過巴神
崔康熙寸寸貢，當然唔抵幫；但基羅斯都唔係善男信女，我求大俠覺得佢嘅行為仲過份過崔康熙。喺對上一場世盃外，南韓只係小勝烏茲別克1:0，令烏茲別克嘅得失球差未算太差，仲有機會喺最後一輪力壓伊朗晉級。基羅斯就鬧南韓擺明放水，贏1球夠數，想夾埋烏茲別克屈死伊朗。突然有被害妄想症嘅佢，仲無聊到將崔康熙個頭key落去烏茲別克件波衫度，仲印上件衫度着出嚟，仲要好威咁畀人影相，無聊當有趣！
幾廿歲人，基羅斯真係好似個細路咁，腦殘過巴神！總結亞洲區，日本、澳洲、伊朗同南韓將會直接出線世盃決賽周，約旦同烏茲別克就要踢兩回合嘅附加賽，勝方仲要同南美洲區第5名爭一個進軍巴西嘅席位。
另外，澳洲國家隊周三喺悉尼同8萬名球迷一齊慶祝入決賽周。
南韓與伊朗恩怨
事件1：南韓主場小勝烏茲別克1:0
基羅斯炮轟南韓放水，穿上自製上衣諷刺崔康熙，南韓保留追究權利。
事件2：尾輪大戰前「間諜」事件
伊朗職員假扮記者混入南韓營地，被踢爆身份，崔康熙表示討厭伊朗，希望與烏茲別克出線。
事件3：尾輪大戰後侮辱敵軍
基羅斯向崔康熙做出侮辱手勢，南韓球迷向伊朗職球員掟雜物；崔康熙請辭。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange