蒙牛（2319）果然貫徹中糧系的特質，兩個月之內做三單M&A，仲忙過好多ibank。有芬佬朋友笑說，呢間公司都唔係做生意嘅，不如轉行做私募基金好過啦！蒙牛全購雅士利（1230），作價相等於2013年市盈率約19倍，相較另一隻高檔啲、經營較好的合生元（1112）22倍市盈率，唔算折讓太多。蒙牛仲講到明，唔會整合雅士利，而雙方業務的協同效益亦好有限，如果最後收過90%貨，蒙牛會計劃5年內將佢重新再上市。
呢單交易如齋計數，蒙牛未來2年的盈利的確會顯著上升。就算當佢最後要舉債近100億去收購，利息5厘計，每年利息開支4至5億元，扣扣埋埋，雅士利都仲有2億幾盈利可以貢獻到出嚟。
但投資者會問，雅士利呢間公司長遠的經營質素如何？有業內人士就話，雅士利向來做生意名聲麻麻，尤其是08年毒奶粉瀨嘢後，公司不理分銷商死活、唔肯回收產品的做法，令它與終端商家積怨頗深。
而雅士利在公佈收購前大派特別息，春江鴨急升的情況又令人感不爽。蒙牛究竟有無睇錯？要wait and see。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange