碼頭工人做到癲先賺得雞碎咁多，電影嘅茶水阿姐又有幾多？答案係月薪4萬6千蚊！今年香港電影市道好番啲，幕後即狂加價，繼燈光同機工會加完，4月輪到梳頭化妝（梳化）同茶水職工加，茶水由每組（一組九小時）850蚊加到950蚊，表面上只係加得嗰一百蚊，但每過一小時嘅超時補水就得人驚啦，由30蚊升至118蚊，茶水基本上每日最少有5小時補水，即係每日袋1,540蚊，如果去盡啲開足30日，月薪就有4萬6千蚊。
而梳化職工就由1,500蚊升至1,600蚊，補水每小時30蚊升至200蚊，加幅咁大，好多電影公司唔肯支持。
《冰封俠3D》投資老闆蕭定一認為加得離譜，只會累鬥累：「一個茶水阿姐若開足一個月，連補水可以有成4萬幾蚊人工，真係好搵過銀行經理。咁搞法，咪逼住喺茶餐廳請個人嚟做，又或者唔用茶水囉！化妝咁貴，我咪搵化妝學校啲新人嚟化囉！」
巨星照用貴「梳化」
不過紅星好似古天樂同劉德華，係指定要用化妝師，結果電影公司都係焗住要畀新價。電影工作者總會副長田啟文（田雞）噚日話：「佢哋唔係屬會會員，自己成立咗個梳化職工大聯盟，佢哋話通過加價後，有電影公司已經肯畀新價，所以冇乜好傾啦！」
做咗電影化妝師40年嘅資深化妝師文潤鈴，行內都叫佢做玲姐，佢係周潤發、李連杰御用化妝師，對於今次加價，玲姐噚日話：「我比較彈性，可以簽月薪，其實個加幅係點我唔多清楚，如果業內有意見咪大家再傾吓啦！」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange