錢小蕙監製過多部電影，包括《絕世好Bra》，同時亦曾經作為發展基金的批核成員之一，她認為基金推出的原意，應該是扶植香港電影工業的創作，早前她在辦公室接受訪問，她說：「自從合拍片盛行，香港年輕一輩新演員拍戲嘅機會越嚟越少，特別係女演員，因為要符合合拍制度要有內地演員，最通常亦都最易安排嘅角色，就係男主角嘅老婆。不過𠵱家問題係好多吃香嘅演員都唔後生，嚟緊你見到有乜嘢可以接班嘅男、女演員？所以電影基金可以幫到一啲有理念嘅導演，去拍一啲相對冇咁容易賺錢、本土化嘅電影，同時提供機會畀年輕一輩嘅新演員。」
薛凱琪受惠
錢小蕙續說：「好似薛凱琪（Fiona）就係咁跑出嚟，拍咗《分手說愛你》、《人間喜劇》兩套戲，都係基金資助，間接提供咗平台畀新一輩演員。除咗Fiona，Shine徐天佑都係基金嘅受益者，納稅人嘅錢至用得其所。」不過基金當中有部份規條，錢小蕙覺得是不合理：「我做過負責審批嘅委員，覺得嗰份申請書有唔合理嘅地方，例如有欄要你填income forecast（預計收入），同會賺幾多，即係叫人作，冇人可以預知部戲賺定蝕，如果我真係計到實賺使鬼搵你呀。」她表示雖然不合理但都可以理解。
但對於近日基金的運作及審批過程，覺得比條文更不合理，錢小蕙炮轟說：「以《人間喜劇》為例，由入紙申請到批出，前後都係兩個月就有答覆，其間可以容許電影先開工，假如最後都係批唔出，都係電影人自負盈虧。𠵱家成個制度轉咗，佢唔批你就唔准開工，如果你偷步可能影響基金嘅審批。問題嚟嘞，好似之前有電影公司申請基金，拍套改編網絡小說《那夜凌晨，我坐上了旺角開往大埔的紅van（上）》，農曆新年前入紙所有劇本、預算都交齊，到今日前後5個月，文件來來回回，擾擾攘攘都未得，到底係基層辦事不力定係電影出咗問題，都希望可以有個答覆。」
惠英紅爭氣
錢小蕙解釋電影跟很多行業不同，工作人員跟演員都要度期，絕對沒有可能一班人停下來等，加上不能偷步開拍，令制度變得更死，她說：「以前可以拍住等結果，𠵱家唔可以，未批一開拍就有機會turn down（拒絕）你。明白政府機構運作要時間，但唔係議而不決。」另外，錢小蕙透露曾經有導演的申請被基金否決，最後電影完成更橫掃亞洲區最佳女主角獎項，她說：「嗰套咪惠英紅嘅《心魔》囉。」
撰文：何永寧
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange