《喜》巴黎聖日耳門（PSG）如無意外會放人，畀安察洛堤過檔皇家馬德里，但係佢哋對意大利教練情有獨鍾，諗住搵卡比路（圖）嚟頂肥安個位；而卡比路喺俄羅斯國家隊嘅教練位，就由另一個意大利名帥文仙尼補上。
PSG終極目標係雲格
消息話PSG畀熱刺領隊波亞斯請食檸檬後，將目標轉到卡比路身上。因為卡比路同俄羅斯國家隊仲有1年合約，所以PSG要畀300萬歐元幫佢贖身，但呢筆錢對佢哋來講，濕濕碎啦；而意大利傳媒仲話，卡比路會喺禮拜三上任成PSG新帥㖭。不過，法國方面嘅消息就話， PSG 真正目標係阿仙奴嘅法國主帥雲格，等對方出年夏天同兵工廠約滿之後免費加盟；換言之，佢哋搵卡比路，只係過渡性質，唔怪得俄羅斯足總有信心卡比路會留隊啦。
但聽聞俄羅斯足總都有準備，萬一卡比路真係走人，就搵俾曼城炒魷嘅文仙尼嚟接棒。意甲球隊及意大利國家隊近年喺國際賽雖成績麻麻，但睇嚟意大利教頭仲好有市場。
文仙尼度假騷肌
講開文仙尼，佢雖然俾曼城請食無情雞，不過心情似乎未有因此而受影響。日前佢就返咗家鄉意大利，仲去咗薩丁島度假；雖則佢成48歲，但身材仍然好弗，冇肚腩之餘，心口仲有兩塊「雞扒」。咁又係，佢向來走偶像派領隊路線，梗係無時無刻都要保持最佳狀態啦！至於退咗休嘅前曼聯領隊費格遜，就同太太去咗法國南部度假；話時話，唔知費爵爺知道曼聯新球季一開波就有地獄賽程，會唔會過兩招畀紅魔新帥莫耶斯呢？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange