港股最近變成殼股樂園，深圳科技（106）獲中國地產百強企業之一嘅朗詩入主，兩日爆升近兩倍，反映殼股有價有市。如果能夠與潛在殼股識於微時，回報可以十分驚人。
要做一隻靚殼，有三大條件︰業務簡單、財政狀況佳，以及股權集中。擁有OTO品牌嘅豪特保健（6880），上述條件全部有齊，現價上車值博率極高。豪特在中港澳銷售按摩產品如按摩椅及按摩器，業務單一化，要賣盤話都冇咁易。財務狀況尤其靚仔，現時每股淨現金達0.59元，較噚日收市價還要高，現價買等於將有錢賺嘅業務同埋個殼免費送畀你，認真抵到爛。現時大股東持股接近七成，股權夠晒集中，一旦獲買家相中，要轉手可謂冇難度。
豪特於2011年底上市，招股價1.58元，由於業務走樣，一年半股價插水逾六成，最近公佈盈利大跌87%，股價卻不跌反升，反映投資價值已浮現，現時市值兩億唔夠，若大股東無心戀戰，隨時編寫另一個山雞變鳳凰嘅故事。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange