殼股有價──係小弟近一年嚟嘅houseview，事實亦證明冇點大家，呢四粒字的確長炒長有，最近要數深圳科技（106），一話「被」中國地產百強之一嘅朗詩入主，市值即刻由唔夠10億元，膨脹到超過20億元。加埋個市唔爭氣，正路股冇運行，啲錢惟有炒呢啲業務簡單、細市值、冇乜債同股權相對集中嘅股仔，博隨時中獎。
跟住呢條formula，短線不妨留意第一德勝（918），佢完全符合隨時變身嘅條件。
講業務，第一德勝唔算sexy，佢主事做成衣及運動服裝產品採購、分包、市場推廣及銷售，起初專注生產羽絨外衣及多功能外衣，在內地採購並通過港澳兩地零售商銷售，現時業務已擴展到歐美等地，仲同Polo、H&M、DKNY、Hugo Boss呢啲大品牌建立夥伴關係。簡單啲講，即係做成衣貿易，原本冇乜特別，𠵱家反而變做賣點，夠簡單方便變身。
目標價先睇1.03元
講市值，以昨日收市價0.71元計，市值只係5.5億元，比深科獲朗詩入主前嘅8.1億元仲低。講債務，截至去年9月底，第一德勝現金及銀行結餘總額3,310萬元，借款淨額5,500萬元，資產負債比率60%；條數冇乜特別，但估計真係要還嘅話，應該冇乜難度。股權分佈方面，主席兼行政總裁黃德順持股66.49%，股權集中程度可以高濃度嚟形容。
總括上述幾瓣要素，第一德勝已可被定性為一等一靚殼，更關鍵嘅係近期股價走勢強得超唔尋常，噚日更逆市創新高，高見0.75元，似乎係有啲嘢囉！仲有一點值得一提，公司日前發盈喜，預期截至今年3月底止全年業績，將由虧損轉為顯著盈利。有盈喜墊底，買佢嘅安全度又提高咗。
目標價方面，老實講，好難set囉！因為炒呢啲殼股概念都係冇乜譜，不過硬係要set價嘅話，就用番深科未獲全購前嘅約8億元市值做目標，折合大概係1.03元，不過小弟估計應該唔止！
陳承龍
本欄逢周四刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange