03年特區風雲色變。沙士來襲、負資產湧現，23條殺到埋身，50萬人終在7.1上街怒吼；時任行政會議成員的自由黨田北俊見不滿情緒一發不可收拾，上京陳情後倒戈，以八票煞停惡法。這位反23條「人民英雄」憶述，當年社會怨氣是由外圍因素帶起；十年後的市民怒火，卻似乎直指「唔掂」梁班子。03年，中央政策組首席顧問劉兆佳錯估7.1只會有數萬人上街。田北俊認為，今天政府對民情的掌握，「弊」過03年。
記者：許偉賢 莫劍弦 陳雪玲
「不要23條」、「董建華下台」，眼見黑漆漆的人影遍佈維園，田北俊當年心知不妙，「嗰時諗：如果𠵱家過咗23條，香港更加唔穩定」，結果他悄悄飛北京，4日上午會見時任港澳辦主任的廖暉及統戰部部長劉延東，力勸押後立法。
上京陳情獲中聯辦引線
外界以為田北俊此行「瞞着」董建華，當事人十載後自揭，其時得到特區政府及中聯辦全力引線，「否則我一個人飛上去都見唔到咁多人」。但中、西環合力「推波助瀾」後也無法令中央心軟。田北俊直指：「呢件事（23條立法）根本唔係董生可以決定到。」
軟功不成惟有出硬招，田於6日宣佈辭任行會兼八票全反對，迫使董建華7日晚凌晨宣佈押後23條立法，他笑着憶述：「搵人向董生送信辭職後，都唔敢聽佢電話，你知啦，佢好識𠼱人，𠼱𠼱吓我唔知點做㗎嘛。」
田北俊不覺當年一個決定，扭轉特區整體發展，更形容自由黨也犯錯，「3、4、5、6月都冇乜留意（民意），7.1先知大件事」。
民怨源自政府不解民情
回望這件影響特區發展的大事，田北俊稱當年民怨爆發，與外圍因素極有關：「嗰年有幾樣嘢間接令董生同政府一鑊泡，查實八萬五冇上到馬、負資產唔太關佢事，沙士更加係唔好彩，無端端香港中招，同佢有關事嘅只有23條。我唔覺當時有個講法話：呢個政府好唔掂。」
但10年後7.1前夕，田北俊卻感覺民怨全數來自內部，矛頭直指梁班子管治不善。「03年好多市民擔心冇工做，又驚23條，但今時今日，香港有咩唔掂？真係冇乜。」他續指：「𠵱家好似好多市民覺得：呢個政府好唔掂。由特首、司長到行會成員都係。」田北俊不諱言：「如果掌握到民意，出到嚟嘅政策就唔會咁『鑊』；施政出咗事，民望先咁低㗎嘛，𠵱家（評估民情）仲弊過十年前，行政同立法關係亦更差！」
03年7.1大事記
2月11日：
行政會議通過就《基本法》23條立法的條例草案，保安局局長葉劉淑儀四出硬銷
3月9日：
財政司司長梁錦松被揭在提高汽車首次登記稅前偷步買車，促其下台聲不絕
3月31日：
沙士擴散社區，衞生署宣佈封鎖疫廈淘大花園E座，世衞兩日後對香港發出旅遊警告
7月1日：
50萬市民參與七一遊行，來港出席回歸慶典的總理溫家寶未待遊行開始便離港
7月5日：
特首董建華宣佈就23條立法作修訂，但如期在7月9日提交立法會二、三讀
7月6日：
自由黨主席田北俊上京陳情後，要求政府押後23條立法，並辭去行政會議成員
7月7日：
董建華宣佈押後23條立法
7月9日：
5萬市民參加立法會外的反23條晚會，黃宜弘向示威者豎中指
7月16日：
葉劉淑儀與梁錦松宣佈辭職
7月28日：
內地開始放寬居民以個人身份來港旅遊，派出厚禮穩定民心
9月5日：
董建華宣佈撤回23條立法
11月23日：
民主派於區議會選舉大勝，民建聯遭到創黨以來最大挫敗
資料來源：《蘋果》資料室
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange