早兩期講到未來幾個月，港股好有機會出現更大動盪，唔擅於短炒嘅朋友，可以趁嚟緊反彈浪減持股份，睇定形勢先再重新入市，而由𠵱家直至確認方向之前，買貨行動只限於短炒，之前講過汽車股係博反彈冇死錯人嘅選擇，勇進嘅就可以留意風電股。
風電股裡面，無論係華能新能源（958）、大唐新能源（1798）、龍源電力（916）定係金風科技（2208），圖表走勢都係偏強，全線喺近期高位徘徊，完全冇俾近期個衰市打擊。
喺近期醞釀反彈浪之下，資金都冇意思沽出風電股換馬去低殘股份，睇嚟去到稍為風平浪靜日子，風電股應該又有一輪炒作。
風電股板塊中，晉佳依然係鍾意下游發電業務，多過上游嘅風電設備業務，所以都係喺華能新能源同大唐新能源裡面選擇。其中，已經連續五日做陽燭陀螺嘅華能新能源，博佢上試甚至突破3元，以跌穿50日線2.60元做止蝕，算係有值博率。
短線目標3.2元
舊年年尾，晉佳已經講過華能新能源有幾好，主要係因為風電棄電問題會逐步解決，盈利回復增長，可測性亦變高，到𠵱家大約半年，股價都升咗成倍，已經反映咗上述嘅利好因素。大行花旗5月21日發咗份報告，上調華能新能源盈利預測，預測2013年市盈率16.5倍，對於增長股嚟講，估值變得合理。
華能新能源風電業務未來兩三年變數肯定細，就算內地經濟點差都唔關佢事， Keep住增長機會唔細，所以個市動盪，股價都跌唔落。基本因素方面嘅唯一風險，係佢舊年財務費用佔收入四成咁多，加息會對佢影響好大，但係內地經濟唔好，通脹未升溫之前，照計加息都唔會係近期嘅事。
最近一個月，華能新能源曾經三試3元關，都打番落嚟，但2.60至2.70元又有支持，近期似係部署下一輪升勢，再挑戰3元，如果成功突破，上到3.20元非難事，短線就以呢個做目標價。
晉佳
本欄逢周一、三及五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange