歐洲股神安東尼波頓明年將離開一手湊大嘅富達中國特殊情況基金，呢個中國大好友，2010年為咗一圓中國夢而東山再起，點知俾民企玩殘，「代表作」是高位插水超過九成嘅霸王（1338）。
習李新政府擺明以調結構行先，增長重質不重量，中資股如水泥鋼鐵產能過剩問題嚴重，短期難有運行，相反奶粉股需求強勁，股價亦越升越有。據《北京晨報》報道，工信部已發佈提高乳粉質量水平，提振社會消費信心嘅「雙提」行動方案，合生元（1112）作為龍頭企業，食盡優勢。集團近兩年盈利keep住四至五成增長，由於主打高檔市場，加上食物安全備受重視，毛利率及市佔率只會越升越有。滙豐證券早前發表報告，認為合生元市佔率三年內將倍升至6%，更大幅調高其目標44%至62元。
睇圖表，噚日已升穿短期下降軌，收市後蒙牛（2319）落實以溢價近一成全購雅士利（1230），相信會成為合生元新一輪升浪嘅催化劑，如果高開唔多，絕對有值博空間。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange