朋友來電，叫左丁山去參加一個創業論壇。創業？左丁山未試過噃，做個體戶唔算創業吖，不過以前做過創業投資基金（現在時興叫做私募基金），睇過唔少項目，叫做勉強識少少嘅，但要出席創業論壇就無謂嘞，不過朋友話：「呢個創業論壇有睇頭噃，既有阿里巴巴牙擦仔馬雲，又有明星歌星謝霆鋒和摩根大通亞洲區副主席方方，你估嘢小呀，而且論壇主持人你諗都諗唔到，係陳志雲呀！」
陳志雲？佢識搞飯局啫噃，點會識創業？朋友話：「你有所不知，呢個論壇有好多名人、富二代、富三代支持，霍啟剛出面扯頭纜，故此可以搵到馬雲來港講創業，但成個論壇交由商業電台做製作，馬雲嚟喎，商台有邊個節目主持擔得起呀？最後商台咪派出志雲大師親自出馬囉，嗱，只要到時志雲使出功架，冧到馬雲講創業秘笈，咁就值晒票價啦！」
唔，馬雲碰志雲，唔會一嚿雲，果然有吸引力，何況聽講謝霆鋒除咗唱歌做戲投資舖位非常成功之外，仲創辦咗一間電影後期製作公司（post-production），揚名中台港，係真正有料到嘅年青創業家。馬雲、霆鋒、志雲三人坐在台上講創業，的確值回票價，不過成個講座其實係免費嘅喎，分文不收，朋友話：「唔該留意廣告，免費入場，先到先得，登入 http://www.ybp.hk索取門券，六月三十日下午三至五時在九龍灣國際展覽中心。」睇吓廣告，出席論壇人士還有方方，應該係講創業融資，如何運用資金之類，還有一位李根興先生，記得佢曾在投資銀行服務，後自立門戶，專門做中小企公司買賣嘅中介人。
呢個論壇就叫做「家是香港．伴你啟航．對話創業鋒雲」，年青人（15至35歲）如有創業計劃，想找尋seed capital（種子資本），不妨上網查詢詳情，寫好個project，話唔定，講唔埋可以申請到一筆小資金作開辦費呢。好多年前壹週刊有「壹盤生意」專欄，記者專訪小生意創辦人講創業經營故事，然後由肥佬黎點評，甚受讀者歡迎，創辦小生意原是香港人之DNA，呢個《伴你啟航》青年創業資助計劃應該有年青人參加啩？起碼睇完志雲大師主持嘅「鋒」「雲」對話之後，會萌生意念先啦！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange