情與義就值千金，咁究竟塵世間嘅一碟餐蛋飯，又值幾多錢呢？少年食神林澄光喺灣仔王子酒店「東來居」嘅餐蛋飯，賣到128蚊，令人議論紛紛。喺銅鑼灣嘅食店心燒食堂，負責人Aska早前抽水，推出咗$12.8餐蛋飯，最初只係賣畀熟客好友，之但係俾前記者柳俊江食完之後係網上介紹，結果抽水成真，搞到好多人都打去問，搞到佢要每日堅賣20碟回應客人訴求。
128蚊餐蛋飯用嘅係聲稱內含金華火腿粒嘅梅林牌浙江午餐肉，一碗飯有四塊，小市民喺街邊係買唔到㗎。$12.8嘅餐蛋飯，用料係美國品牌嘅午餐肉，來貨價28蚊罐，每碟飯得三塊餐肉，比少年食神間嘢少一塊。大家都係有兩隻蛋，呢個回合算係打和啦。至於食客方面，$12.8餐蛋飯，陳淑莊、艾威、柳爺都試過，食神嗰碟貴價嘢，最近就有「細細粒」陳嘉佳品嚐過。
心燒學明哥推待用餐券
Aska話成本價都要成16至17蚊。好彩某間美國午餐肉公司香港代理一知道咗佢哋個計劃，就以優惠價賣啲午餐肉畀佢哋。Aska話受到深水埗窮人飯堂老闆明哥啟發，推出待用餐券，每張25蚊。等市民買咗30張餐券，佢哋就會聯絡聖雅各福群會，免費請30個老人家嚟食飯。
講起最近工商聯叫商戶7.1減價希望減少市民上街單嘢，Aska就講笑話，佢都想請遊行人士上佢舖頭飲可樂，佢今年7.1應該都會上街。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange