【何文田→中環】成班盛男喺無綫真人騷《求愛大作戰》度搵對象，當所有參賽者嘅目標都集中喺港女嘉賓嘅時候，身為資訊科技高級專員，31歲嘅Cyrus原來已經另覓蹊徑，搵到佢嘅人生另類目標。原來佢睇上唯一嘅女導師、被指整容整上癮、年紀比佢大9年，現年40歲嘅陳莉敏（Queenie），雖然佢講嘢尖酸刻薄挑剔參賽者，但係依然吸引到Cyrus嘅錯愛。
咬唇扮可愛
其實喺上星期五進行淘汰嗰集，Cyrus已經透露玄機，喺淘汰前嘅自白當中，Cyrus話：「我好想留低，因為一開始已經對一個人有啲意思。」原來佢講嘅就係Queenie。
前晚Cyrus已經私下行動，同導師Queenie約會，大約7點鐘，Cyrus坐的士去到何文田半山壹號Queenie嘅寓所樓下接佢。兩個人去咗中環士丹頓街落車，佢哋對途經嘅精品店好有興趣，睇之餘仲不停用手機影相，行完街之後，佢哋入咗南亭食串燒。
食飯期間Queenie同Cyrus一啲都唔似導師同學生嘅關係，不知幾好傾，40歲嘅熟女Queenie不時含情默默望實Cyrus，仲成日咬唇伸脷扮可愛。一餐飯食咗兩個鐘，飯後佢哋沿住士丹頓街行咗一陣先至截的士走。
採訪、攝影：陳辰、李志明
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange