港股噚日大幅反彈，有779隻股份上升，不過水泥板塊就繼續尋底，睇怕有排都未見家鄉。自從內地經濟增長放緩，阿爺打壓房地產市場，水泥股一直都冇運行，當中，華潤水泥（1313）已經由首季高位回落三成，昨日仲逆市跌0.5%報3.79元。
跌足咁耐，瑞銀都忍唔住出手叫買，指潤泥已經跌咗好多，相信已大致上反映晒宏觀環境及內地水泥市場疲弱的不利因素。公司去年PE為14.4倍，保守估計，現價相等於今年預測PE達10倍，換句話說，今年盈利應該可以好過舊年。
潤泥主要經營地區在廣東及廣西，瑞銀指由年初至今，兩個地區的水泥價格每噸已下跌50至85元人民幣，導致部份小型水泥廠已開始蝕錢。相信水泥價格已經見底，只要雨季完結，第三季開始有望逐步回升。
水泥價見底 瑞銀叫買
該行預計，潤泥上半年仍可賺錢，同時銷售量可按年增長逾三成，故將其評級由「中性」升至「買入」，不過，始終內地經濟增長放緩，都會影響潤泥業務，故將目標價由5.50元降至4.85元。
雖然瑞銀唱好，不過，摩通最近就先後減持安徽海螺（914）及中國建材（3323），水泥股都仲係有好多不明朗因素。睇番潤泥走勢圖，暫未脫離下跌軌道，但若守穩3.30元水平，可考慮小注撈底。
瑪姬兒
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange