土共打壓7.1遊行嘅手法都算有進步㗎啦，起碼唔會好似10年前嘅7.1咁，由工聯會「生人霸死地」喺維園book咗六個足球場搞聯歡會。佢哋今年由「全港各區工商聯」商戶喺7月1日提供折扣優惠，而且大部份優惠都只係下午兩點至五點有效，實行用銀彈拉低上街人數。不過，大家只要抱住「食窮工商聯、票投大遊行」嘅心態，都可以開開心心咁響應呢項活動㗎。
7.1大遊行由銅鑼灣維園出發，去到新政總之後再落中環。大熱天時，出發遊行之前，最好先做個SPA，咁啱銅鑼灣摩頓臺皇室水療Royal Sauna當日上午11點至下午12點有九折優惠喎。之後最好就係去醫肚啦，大家可以去白沙道鉅記餅家幫襯，全日九折㗎。
行行吓行到灣仔，就可以去柯布連道間海天堂，當日買滿71蚊，可獲贈龜苓膏買二送一券一張，吓，咁咪又要再幫襯過佢囉。到咗政總，不妨跟手去名都酒樓飲茶補充體力，5點前幫襯溏心蠔皇鮑魚，有五折優惠，折實$234。終點係中環，行完可以去威靈頓街米蘭站，正價貨品有九折喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange