最近最多人講嘅戲，一定係劉德華同林志玲主演嘅《天機．富春山居圖》，因為呢部戲係一面倒俾人鬧爆，真係近期話題之作，大家都好奇想去睇吓有幾爛，所以內地票房8日過咗2.5億，香港上咗5日就收140萬。
呢部自吹投資咗1.6億人民幣，橫跨杭州、杜拜、台灣、東京同米蘭拍外景嘅大片，可謂刷新爛片底線，有內地網友話：「如果恨一個人，帶他去看《富春山居圖》，如果你想要恨一個人，讓他帶你去看《富春山居圖》。」馮仁昭好奇睇咗部戲，只能話導演孫健君有野心，但火喉未夠。
怕連累《盲探》
早兩日華仔去咗上海宣傳新戲《盲探》，唔少內地記者問佢為乜接呢部戲，又話佢知劣評如潮，華仔話：「我覺得每個人都是公平的，觀眾不是我的敵人。對不起大家，下一次會演好，千萬別因這部片影響到《盲探》。」
另外，噚日《盲探》導演杜琪峯同荷李活名導奧利華史東（Oliver Stone）喺上海出席座談會，奧利華讚杜琪峯嘅電影充滿冷暴力美學，希望有時間睇《盲探》，杜琪峯就話好欣賞奧利華嘅電影對社會有批判性思考，兩人互笠高帽。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange