香港電視（1137，HKTV）幾時或者會否獲發免費電視牌仲係一個謎，難得「魔童」王維基可以不斷燒錢，唔停手拍劇。魔童噚日出席一個午餐會後，公開講明「資金充裕」，之前賣寬頻業務套現50億元，仲有好多喺手，寸嘴話起碼夠用十年，「換多兩、三屆特首都捱得住！」
《警界線》首播勁多like
講係咁講，王維基應該都想快啲攞到牌，否則都唔會喺上周五，將佢哋套劇《警界線》第一集放上網，企圖利用公眾力量，爭取盡早獲得發牌，華華嘅facebook亦被洗版。
王維基噚日話，套劇上載唔夠48小時，已經有超過三十萬人次睇過，仲有逾一萬條意見，當中99%都係正面，佢覺得好鼓舞。至於第二集幾時出街？會唔會食住個勢搞個網台播住先？王維基就斬釘截鐵話「第二集係想免費電視度播」，所以政府唔該快啲順應民意，從速發牌咁話。
寸電盈唔夠砌
魔童台上台下都係咁信心爆棚。喺呢個午餐會嘅台上演講時，自爆從商十幾廿年，做銷售預測冇一年做得準，年年都估錯數，仲寸爆咁話「我點估到香港寬頻有一日，會賣寬頻仲賣得貴過電盈㗎？」即時贏得台下熱烈掌聲。
王維基其實係想講，估咁多都無謂，就算家陣有人話HKTV將來有一日廣告費會貴過TVB，都唔會有人信，惟有堅持自己做緊嘅係好事，節目有觀眾欣賞，自然就會有收入㗎喇。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange