碧咸上個月先喺巴黎聖日耳門掛靴，搵完歐元就轉戰中國搵人仔，周一飛到北京，進行退休後首次中超大使推廣工作，不過呢排中國球壇風風雨雨，大敗畀泰國後，國足教練甘馬曹盛傳被炒，碧咸今次之行又幫到幾多手？
捐車又捐衫真識做
其實碧咸3月已經嚟過中國宣傳，仲有着西裝踢波跣腳呢個經典場面㖭，今次再嚟身份就有啲唔同，事關佢老哥已經唔再係足球員嘞；「萬人迷」會留喺中國7日，包括探訪江蘇舜天、上海申鑫等球會，又同中國學生交流，最緊要係周六會到杭州，參觀綠城主場對北京國安嘅中超比賽，可惜港隊代表李志豪7月先完成註冊加盟國安，未能喺碧咸面前獻技。碧哥周一剛到北京已經馬不停蹄，又捐跑車又捐波衫，協助中國足球發展；公關工作亦做足，剛開通新浪微博，短短6小時，碧咸嘅微博已經吸引到近20萬粉絲關注，不過咸爺第一個關注就係佢老婆維多莉亞，不愧係模範夫妻。
國足貼錢趕走甘馬曹
碧咸上次嚟中國表明只係義務性質，仲希望教育中國下一代熱愛足球。不過中國足運好似越搞越衰；上周六國足主場1:5大敗畀以U23為骨幹嘅泰國，簡直就好似國恥。事後就出現各式各樣傳聞，好似賽前英國博彩公司威廉希爾，收到來自中國投注者約7億人仔，買泰國淨勝中國3球或以上有接近40倍回報，結果威廉希爾就咁要賠280億人仔，當然威廉希爾事後就否認有關傳聞。不過較真嘅傳聞，係國足球員想聯手逼走現任教練甘馬曹，不過要炒甘馬曹，中國足協就要賠600萬歐元違約金，國足一班大帝仲想集資，希望幫足協賠呢筆錢；點都好，西班牙籍嘅甘馬曹就孭硬呢隻鑊㗎喇！
不過計我求大俠嘅睇法，中國足球就真係爛到透，並唔係一個洋名將，一個洋教練就可以扭轉局面。之但係人民幣力量又真係好勁，好似前曼城、英格蘭領隊艾歷臣，都抵受唔住人仔威力，正式落實擔任廣州富力教練，另一支位於廣州嘅恒大，已經由意大利名帥納比執教，之後嘅廣州打吡肯定更有睇頭嘞！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange