《大公報》創刊111周年，兩位死對頭前特首曾蔭權同現任特首梁振英都有出席，但全程零交流，如果狼英唔係要頒個「大公之友」證書畀煲呔同互相祝酒，兩人一定當對方透明，皆因佢哋握手兼碰杯都係蜻蜓點水。入場時，兩人排排企，八方大聲問煲呔點睇梁振英民望長期肥佬、有乜嘢建議畀佢，兩個人當然冇回應啦。不過煲呔之後向記者區微笑，唔知係咪好鍾意條問題呢？
狼英致辭不及曾鈺成
將梁振英比下去嘅，唔單止有曾蔭權，仲有立法會主席曾鈺成。慶典上，狼英同曾鈺成分別致辭，狼英講嚟來講去又係佢自己先有興趣嘅G2G、B2B、拜訪內地各省各縣高官，相反曾鈺成一開口，就憶述自己中學時代已向《大公報》投稿，獲賞識刊登，細佬曾德成亦都喺《大公報》工作過，雖然都係一篇擦鞋演辭，但總算來得幽默有趣。
噚日中聯辦新任副主任楊健都有嚟，話自己以往都做過記者廿多年，相信日後同香港傳媒交流一定非常自然愉快。佢話「香港記者總是來得早，走得晚，提問最踴躍」。既然楊健做過記者，咁平日不妨睇吓中聯辦門口個花槽同鐵馬點樣阻礙採訪兼示威啦。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange