斯諾登事件，人們約有兩種意見，一種是「真係㗎？點解嘅？」
另一種則是黃子華式的「係咁㗎啦，好出奇啊？」
真係㗎？美國政府真係咁衰格，監控互聯網，連facebook都有份啊？點解嘅？我都唔係恐怖份子，點解要監控埋我嘅？
真係㗎？美國真係同中國一樣，做啲咁嘅衰嘢？點解嘅？美國唔係自稱民主國家㗎咩？
真係㗎？斯諾登真係覺得香港有言論自由，所以匿埋喺度？點解嘅？點解我地唔覺有嘅？
真係㗎？斯諾登原來係CIA嘅……外判工嚟㗎？點解嘅？外判都可以知道咁多機密資料嘅？碼頭個啲外判工，連自己個老細係邊個，都差啲唔知嘅？
真係㗎？梁振英真係連講7次no comment啊？點解嘅？佢唔講少一次或者講多一次喎，佢真係好鍾意呢個數目字。
真係㗎？美國真係整咗幾十條控罪想告斯諾登啊？點解嘅？係咪因為香港未有23條，唔可以直接同美國嘅國家安全、叛國間諜呢啲罪相通，搞到要老作咁多單啊？
真係㗎，原來美國連中文大學都hack過入去啊？點解嘅？點解要咁辛苦咁轉折hack入去，點解唔好似嶺南咁樣，委任一個駭人聽聞嘅人入去做校長，直情成個駭客入咗去，做乜都方便好多啦。
係咁㗎啦，邊個政府信得過人民㗎，偷聽你講嘢，好出奇啊？
係咁㗎啦，做特務梗係要偷取情報㗎啦，你去到沙灘都忍唔住望女啦，好出奇啊？
係咁㗎啦，香港人以為美國係民主聖地，美國人咪以為我地有一國兩制、言論自由囉，隔籬飯香，你都以為人地老婆溫柔啲啦，好出奇啊？
係咁㗎啦，朋友同私隱，都係用嚟出賣，你一日都收唔少借錢電話啦，好出奇啊？
係咁㗎啦，香港一向都係收容港，以前收越南難民，依家收政治難民，好出奇啊？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange