呢個幾禮拜來，大家有冇覺得特別心情好？無他嘅，原因就係中情局揭密外判工人斯諾登喺香港。多唔使講，啱啱過咗嘅周末，我同返咗英國老家嘅前Island School同學短訊唔知講啲乜，不過傾傾吓傾到人身自由，佢係咁講佢哋成千幾年普通法傳統，又講話佢哋由Magna Carta開始點樣抗拒極權統治，又喺度講乜拉丁文Habeas Corpus。我見佢一大堆短訊後，我就咁一句：「斯諾登揀咗去邊啫？英國係咪？」
無能banker玩晒
當然，成單嘢我見最到位嘅分析，係利世民夫人幾日前喺facebook問：「有冇人懷疑其實斯諾登只係一個儍佬？」下面第一個答案就係：「有！唔儍唔會信香港政府！」哈哈，笑到我。原來地球上真係有人身體力行信一國兩制！
不過事隔幾日，噚日就爆出英國政府喺09年G20財長會議度，竊聽其他參與國家代表嘅通訊，由電郵、短訊到電話都有。喺咁嘅事實下，其實斯諾登根本唔係儍儍吓來咗香港，而係有充分證據同深思熟慮後，作出呢個決定。因為香港真正係冇參與全球反恐亂來集團，有份嘅話就唔使黑客入侵啦，美帝問我哋某個中層官僚，就要乜有乜，仲要real time咁畀。
好啦，𠵱家由梁美芬到葉劉淑儀議員，通通忽然變晒個人自由天使長，比一向講法治嘅飯民更講法治。𠵱家，我就諗究竟斯諾登會搵邊個律師樓呢？又會請邊個大狀？香港都冇專長，英國進口邊個呢？呢次真係香港卡士、荷里活製作！
不過講番英國09年4月G20嗰次，當時係金融海嘯後，英揆白高敦因逼英國納稅人做啲「資不抵債銀行」嘅擔保人，暫穩情況後被譽為金融超人。原來當時驚其他政府唔合作益銀行，所以玩竊聽。你話，由Magna Carta開始嘅做嘢方法，一朝為銀行們盡喪。又係啲無能banker玩晒，唔怪得啲英國銀行股點都死唔去。
孫柏文
獨立股評人
http://facebook.com/shuen
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange