「伴碟」將自己的命運交予香港市民。
這就是說，市民自行決定打碟，抑或捽碟，懶理被罵做黑膠碟。煲碟也正路，只怕廚房已太熱。飛碟好冇玩？驚他是UFO啊。還是做回伴碟，只要不是伴着內地黑心皮蛋四小碟，應該食得落肚。
伴碟有得留低，開門七件事，先決條件是搵番份工，get the job done。聽講某婦女組織主席已密斟碟兄，請他高科技追蹤會員的富貴老公跟誰化作雙飛蝶。養小三唔緊要，至驚尾大不掉，成批私生子女爭家產。
伴碟hack工了得，側聞一哥很想秘密收編，替署方駭入所有「黑影」的電郵，將佔中力量一網成擒。慳番警力，大支裝胡椒噴霧用來煲鹹菜湯。
做到NSA特工但中學都未畢業，這種出身最啱進軍補習界。中西史肥佬話之佢，星級補習社爭住搵碟sir省招牌，光是做代言人已經年薪百萬，日日開班教宅男hack秘技，精訓愛國愛港的本土尖子，反攻美國。黑社會最愛國，黑客更愛國。香港，自由萬歲。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange