噚日父親節，唔少藝人都喺微博貼上同爹哋嘅合照嚟慶祝，「舊愛陳豪結婚了，新娘不是我」嘅廖碧兒最近因雙陳結婚搞到不停俾人追訪，不過好彩佢有個好爹哋𠱁番，噚日佢貼咗同爹哋嘅相留言話：「父親節快樂！今日好開心同屋企人一齊celebrate Father's Day！Daddy，多謝你咁多年來一直支持我，保護我，愛我……」冇愛人都有爹哋錫，一樣咁幸福。
達明晒龜畫
同樣跟郭富城分手嘅熊黛林（Lynn），因為爹哋過咗身，今年首次過一個冇爹哋喺身邊嘅父親節：「第一年沒有父親的父親節，天國的爸爸，祝你父親節快樂！我們永遠愛你！也祝所有的父親，父親節快樂！」至於癌病康復中嘅張達明，亦都貼出仔女送畀佢嘅龜圖畫出嚟祝福大家。
再做老竇冇耐嘅張晉噚日出席西九龍中心nowTV搞嘅父親節活動，佢同老婆蔡少芬成日開工要離開大女張楚兒（湯圓）同細女張信兒（包子），所以唔使開工，張晉話一定自己親自湊兩個女。講番自己細個，張晉話：「細個俾阿爸罰紮馬做功課，當時覺得阿爸唔鍾意自己，不過𠵱家做咗爹哋之後先知，罰仔女係會痛喺自己心，所以好珍惜同父母相處嘅時間。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange