世界各地嘅體壇爸爸，雖然成年都要為比賽奔波，不過呢個周日都一齊放低工作，同仔女過一年一度嘅父親節。香港有唔少好老竇喺網上大晒幸福；另一邊廂，英格蘭「萬人迷」碧咸喺facebook留言狂吸like。
好似「波子王」歐陽若曦咁，雖要備戰法國勒芒24小時耐力賽，但都毋忘先父嘅養育之恩，喺面書放咗張爸爸嘅舊相出嚟懷緬一番，並揚言會喺賽事造出佳績，送畀喺天國嘅爸爸。
碧咸晒命狂吸like
除咗孝順仔，香港都有唔少廿四孝老竇喺社交網站大晒幸福。前香港風帆代表何智豪左擁右抱，攬住孖女，幸福滿瀉；而前港欖隊長卓銘然亦唔輸蝕，緊抱囝囝影張靚相。但講到甜喇喎，下季將會「上山」加盟南華教練團嘅張寶春，同囝囝食甜品慶祝都嫌唔夠甜，同場加演錫錫，甜到漏！
至於喺地球嘅另一邊，早前掛靴嘅「萬人迷」碧咸一家都好溫馨。佢一早喺面書上留言，大晒3仔1女成朝𠱁得自己好開心。佢話：「世界各地嘅爸爸，祝你哋父親節快樂！阿仔佢哋同哈七一朝早已經錫到我燶，搞到我覺得好特別呀！」平時就算再忙，都好重視家庭嘅咸爺，呢個父親節睇嚟收到仔女唔少驚喜。咸爺人氣勁就眾所周知。呢個status出現咗一個鐘，就已經吸引咗超過6萬個like。唔少球迷都祝呢位38歲爸爸父親節快樂，不過都有啲古怪留言，有人仲問碧咸：「你鍾唔鍾意Justin Bieber？」好笑還好笑，不過唔多貼題喎！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange