曼城新帥比歷連尼教波叻定屎，兩個月後就知，但我求大俠可以肯定嘅係，佢好捉到主子嘅心意。呢位智利名帥知道老細蒙蘇鍾意威，見曼聯𥄫中波蘭前鋒羅拔利雲度夫斯基（羅拔仔），自己都爭埋一份，而且仲用埋藍月亮最擅長嗰招以本傷人㖭！
現年59歲嘅比歷連尼上周五落實成為曼城新帥，仲簽約3年，據報年薪有成500萬鎊（約6,100萬港元）。佢一上場就賣口乖，話要幫班主蒙蘇贏英超同埋歐聯；咁都未算，佢明知蒙蘇要威，見曼聯想買多蒙特嘅24歲波蘭前鋒羅拔仔，於是亦爭埋一份。
多蒙特講明只要有球會出得起2,550萬鎊，就會考慮將得番1年合約嘅羅拔仔出售，但就一定唔會賣畀拜仁慕尼黑。曼聯前領隊費格遜早就𥄫中羅拔仔，家陣見多蒙特肯賣，所以佢已吩咐紅魔新帥莫耶斯跟緊啲。由於曼聯之前幫多蒙特買過日本中場香川真司，個價都幾高，成1,700萬鎊，故此佢哋亦有信心同蜜蜂兵團做埋呢單交易。
20萬鎊周薪利誘
點知中途殺出個程咬金，曼城明明斟緊拿玻里嘅烏拉圭前鋒卡雲尼，突然又叉隻腳埋嚟，同曼聯爭羅拔仔。曼城有蒙蘇撐腰，買人從來唔睇價錢，開畀多蒙特個價，隨時過3,000萬鎊都唔定；而且，據聞佢哋仲開出周薪20萬鎊畀羅拔仔，比曼聯開嘅9萬鎊周薪，足足多咗11萬鎊。站喺多蒙特同羅拔仔立場，可能會傾向揀曼城多啲。
比歷連尼加晒分
如果曼城真係爭贏曼聯簽到羅拔仔返嚟，新球季未開就先贏一仗，比歷連尼幫藍月亮落咗紅魔面，喺蒙蘇心目中仲唔加分咩！話時話，羅拔仔喺暑假約埋效力阿仙奴嘅波蘭同鄉門將施捷斯尼返自己國家玩，唔知有冇趁機問定對方關於英超同喺英格蘭生活嘅嘢呢？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange