韓國人氣組合Super Junior（SJ）聯同SJ-M兩位成員前晚及昨晚在香港亞博館舉行「Super Show 5」演唱會。前晚SJ唱足三個多小時，其中人氣王始源與銀赫最搶鏡，二人除衫鬥晒肌肉外，SJ又反串扮女人唱歌，令到粉絲全晚尖叫聲四起。
反串扮女人
第二次來港開演唱會的Super Junior，成員始源、厲旭、東海、神童、圭賢、銀赫、晟敏及強仁，聯同SJ-M成員周覓及Henry前晚及昨晚在亞博館開騷，名模周汶錡昨晚捧場。前晚SJ唱了逾三個鐘，首先使出晒肌肉招數冧粉絲，由銀赫帶頭除衫谷肌肉。之後他用英文問觀眾：「想不想看始源除衫啊？」粉絲即刻起哄，最高人氣的始源即刻識做，除衫谷肌跑出台，霸氣十足。銀赫更一度落台親近粉絲。
陽剛味過後，始源、晟敏、強仁同厲旭又反串扮韓國女歌手唱歌，齊齊姣爆自摸大髀。晟敏更於演唱會尾聲時趷籮，騷S形身段。扮完女人，SJ繼續發揮搞笑本色，各自扮卡通人物及超級英雄。當中扮孫悟空的Henry更用「龜波氣功」對付扮狼人的銀赫。
東海被夾擊
轉頭SJ又展示兄弟情，強仁捉着東海咀臉，又捉着銀赫的頭，要他與東海咀嘴。東海亦用普通話向歌迷說：「今天晚上給我打電話啊！」令歌迷暈得一陣陣。
神童更獲贈零食，不過他選擇將零食拋落台。安哥時，SJ唱出名曲《Sorry Sorry》後，齊齊在主舞台大嗌多謝粉絲。
昨晚開騷前SJ開記者會見傳媒，始源拖厲旭手仔，果然好兄弟。始源表示不怕扮女人影響形象，被銀赫爆扮韓國女歌手孫丹菲事前做足資料搜集。銀赫亦賣口乖讚香港歌迷比之前更靚及成熟。Henry則趁機會宣傳個人大碟，以唔鹹唔淡的廣東話說：「如果大家支持我，我會好愛你哋，會請大家食飯！」
採訪、攝影：梁婉霞、黃文偉
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange