曾志偉同黃浩單掌摑事件告一段落，唔知志偉係咪開心得滯，噚日凌晨喺將軍澳電視廣播城參與無綫《FIFA洲際國家盃2013─開幕森巴嘉年華》時口不擇言，啄住主持人陳芷菁。志偉一見芷菁為主持球賽做準備時，突然衝口而出講：「真奇怪，唔識體育嘅就嚟講！」之後芷菁話支持日本隊，志偉又笑佢：「咁你咪係慰安婦？」搞到芷菁不知幾尷尬，李克勤即打圓場：「佢係安慰人嗰隻。」最後場波巴西以3比0贏咗日本。
之前有傳高層余詠珊因下令要志偉新劇要用佢老公何哲圖旗下歌星，搞到不和，不過見佢哋即場合照冇芥蒂。係咪不和先？志偉笑話：「雜誌講嘅嘢都信，佢（指余）係負責綜藝，劇集關佢乜嘢事！」咁志偉又覺得邊隊係熱門？志偉笑話：「我唔知，只知𠵱家最熱係陳豪。」
張嘉兒自稱單身
克勤話好開心可以返無綫講波，咁明年世界盃會唔會再效力無綫？克勤話：「十劃都未有一撇，未知，一年之後嘅事隨緣，不過都想參與。」另外，近日有傳張嘉兒俾鄧健泓飛甩，因為男方想翻撻龔嘉欣，張嘉兒話：「冇咁嘅事，如果佢哋真係復合，我會送上祝福，希望佢珍惜。」佢仲表明自己𠵱家冇拍拖。
另外，資深演員黎漢持日前因病逝世，志偉好惋惜話：「又走咗，喺邊度走？自從佢轉咗做風水都好耐冇聯絡，當然好愕然。」而陳百祥就話：「好唔鍾意聽呢啲，當佢去旅行，大家真係要享受現在，活在當下。我對生老病死都睇開，如果我走咗，大家當我去巴西。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange