父親節年年有，但每人每年的感受或有不同，初為人父的洪天明和錢嘉樂今年首次擔任節日男主角，親身經歷一個意義重大的父親節。張晉、林盛斌、黃浩然和關禮傑同是兩個孩子之父，總括他們的經驗，父親節過得越多，快樂也更多！黃浩雖然是非多多，也暫且放下煩惱，好好享受為父的快樂，林德信則視林子祥這個超級型爸為投契的長輩。縱使各人對父親節的感受和慶祝方式都不同，但大家都會趁今日父親節講同一句話，就是「父親節快樂！」
嘉樂：每日擔心囡囡
今日父親節，對新任爸爸錢嘉樂和洪天明來說別具意義。錢嘉樂的太太湯盈盈三個月前為他誕下囡囡錢凱晴（Alyssa），對於榮升老竇後過首個父親節，嘉樂坦言：「開心興奮，以前人人話我係大細路，冇乜承擔，𠵱家睇法唔同晒。」
囡囡出生後，嘉樂有感將家庭關係扣得更緊，他笑說：「以前父親節冇乜感受，好行貨買筆、鬚刨畀爸爸，𠵱家就知父母偉大，我每日都擔心囡囡，𠵱家先知爸爸擔心咗我幾十年。」想收囡囡甚麼禮物，嘉樂說：「佢乖乖哋，唔好做壞人就得，佢本身已經係禮物。」
而洪天明和周家蔚的愛子洪大仁已四個多月大，今日跟爹哋及爺爺洪金寶三代同堂慶祝父親節。對於首個父親節，天明坦言未有特別感覺：「始終佢未識叫爹哋或整禮物畀我，佢都唔知乜嘢事。」囝囝令天明跟爸爸關係更親密嗎？天明說：「都差唔多，反而爸爸同阿仔親密啲，爺爺想見孫仔多啲。」談到對囝囝期望，他說：「最緊要佢身體健康，唔使太期望要佢做乜嘢專業人士，只需要佢唔好做壞人，健健康康就得。」
採訪：葉雪
張晉熱鬧家庭樂
在電影《一代宗師》中飾演馬三的張晉已是第三年過父親節，今年是跟出世未滿三個月的細女張信兒（包子）的第一個父親節。他表示做父親後更體會親恩深重，今年他憑《一》片跑出成為「面子」，幸好父親節當日都能與太太蔡少芬在港過節，他在電話說：「上晝出活動，夜晚一家人食飯。上次母親節大女楚兒（湯圓）做咗『I love you』手勢畀媽咪睇，唔知佢仲記唔記得啦。」家中已有包子及湯圓兩個「點心」，張晉笑言夠數不會再追，他說：「屋企已經夠晒熱鬧嘞。」
採訪：何永寧
丁子高怪獸爹哋
丁子高與楊千嬅及剛滿一歲的囝囝Torres共度第二個父親節，他提起囝囝即難掩喜悅：「佢第一粒發音係爹爹，𠵱家有時講到daddy，個樣似足我，同我一樣有手汗，生活動作似老婆。」他透露與千嬅有共識，由她做好人，自己飾惡爸：「仲未做到，個仔好醒目，想瞓覺搵媽咪，想玩搵我，食嘢搵姐姐。」丁子高謂身為愛控制的獅子座爸爸，難以不做怪獸家長，見到朋友仔女一歲識游水和識彈琴就像識呼吸一樣，他也不執輸，囝囝Torres開始上playgroup學普通話和英文，喜歡打鼓。丁子高放工和周末會陪囝囝玩，他自認是70分父親：「爭30分，留畀佢開始大個，同佢一齊進步，好似父子檔學武術。」
採訪：唐如
Bob收冧爆香吻
林盛斌（Bob）家有兩個可愛女兒，日前5歲長女霏霏跟媽咪及1歲多妹妹熹熹為爸爸帶來父親節驚喜，除了向爸爸送上香吻外，霏霏在餐廳邊用畫紙剪出領呔形狀邊說：「我將心愛貼紙全部貼上去送畀爸爸。」之後兩個囡囡又在餐碟畫上爸爸的四眼嘜頭，Bob抵死問霏霏誰是全世界最靚仔的人，霏霏堅定說：「係爸爸！」𠱁得Bob笑到見牙唔見眼，Bob表示從不打罵一對囡囡，他說：「我希望佢哋嘅童年係充滿開心回憶。」果然是慈父！
採訪：比華利
攝影：陳俊強
場地：Grappa's Kimberley
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange