小時候，例牌作文題目《我的志願》，大家還記得麼？車婉婉已忘記了，卻記起曾取笑哥哥的志願：擁有幸福的家庭。隨着成長，經歷母親、婆婆離世、接手母親生意，才開始明白箇中真諦，現在婉婉除了想有個幸福的家，也希望對這個繁華緊張的都會負上小小的社會責任，做一些令人開心和健康的生意。
撰文：胡比
車婉婉母親車綺芬07年因肝病離世，婉婉接手母親的飲食生意，做得有聲有色，其後推出自家品牌的星座香水，更有傳將會與謝霆鋒合作搞食肆，做生意做上癮，最近還成為岩盤浴專門店的代言和策劃人，婉婉沒想過當女強人，但冥冥中總有主宰。
憧憬組小家庭
自從去年陳志雲入主商台，婉婉主持了五年的節目被大清洗，當初她確有點失落，她說：「試過搭的士，司機問我係咪車婉婉，話認得我把聲，仲話好掛住我個節目，失落就變成開心，我覺得上天安排每件事，都有原因，閂咗一道門，會有好多其他嘅門開，睇你識唔識把握機會。」
婉婉表示做人最緊要認清自己的目標，有方向才不會迷失，那婉婉的目標又是甚麼？她直言：「我目標好簡單，想要一個幸福嘅家庭，以前聽我哥哥講志願係要一個幸福家庭，我話咁㗎咋，好弱呀，做總統吖嘛！越大越發現，自己喺單親家庭長大，要做一對幸福的couple，唔好講有冇仔女，都已經好難，呢個世界咁多誘惑，仲有咁多選擇，如果有埋小朋友，點教育佢哋係非常困難嘅事，兩個人唔係只有兩個，仲要同人哋屋企人相處，真係好多學問，最緊要兩個人基本要有同樣嘅價值觀。」婉婉不諱言男友與自己價值觀相近，已視他為結婚對象。談到結婚計劃，她笑言：「結婚唔使計劃，要結下星期就去結都得。會唔會秘婚？有乜嘢你哋係唔知㗎！」至於生小朋友，婉婉表示這是上天給的禮物，不由自己控制，一切隨緣。
趕及送別外婆
毋須每日返電台，婉婉多了時間體驗生活，尤其自小湊大她的外婆於去年離世，令她更懂珍惜，更關注老人的問題。提起外婆彌留情景，婉婉仍歷歷在目，眼泛淚光強忍傷痛憶述說：「婆婆湊大我，有好深厚感情，媽咪過身後，就由我一直照顧佢。」其後外婆患上腦退化症，最後更要在醫院留醫，有日其家人致電身在海外的婉婉，表示外婆生命危在旦夕，婉婉卻未能即時回港，令她心急如焚：「我係一個睡寶寶，嗰晚成晚都瞓唔着。第二朝終於有機位，上到飛機乜都冇食，淨係飲水，落機想去廁所，book咗車接我，又搵唔到部車，點知阿哥就打嚟話婆婆好危險，我同阿哥講叫婆婆等埋我，最後連廁所都冇去，一上車就不停嘔，個感覺好難形容，好心急但樣樣嘢都好慢，不停諗點解咁耐都未到。到咗之後即刻飆上去，最後都趕得切，陪咗佢一日，佢就好peaceful咁走咗。」
髮型：Billy of Hair Culture
服裝：I.T、Off The Wall-apple
場地提供：清心岩盤浴專門店
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange