今日係父親節，求大俠先喺度同大家講聲父親節快樂。每年父親節，我求大俠都一定提早揀定禮物送畀老竇，但近排因為忙到死，加埋又唔知送咩好，於是噚日先得閒上網搵吓，點知畀我見到《每日郵報》有篇文係講關於父親節禮物，佢哋特別由20隊英超球會嘅官方產品中，挑選咗一系列適合送畀父親嘅禮物，而且大部份都係球會嘅新產品。不過睇完後，有啲禮物真係笑到我標眼水。
首推就係阿仙奴嗰條「紅白黑」牛仔褲，簡直攞你命三千。呢條褲隻色唔單止完全襯唔到衫，就咁睇，條褲啲顏色配搭都完全唔均勻，最頂唔順係，喺褲襠位無端端有阿聯酋航空贊助商個名，我真心想問設計條褲嗰位仁兄到底想點？最慘係呢條褲原來係屬於禾確特品牌系列，條褲後面仲印咗禾仔個名同14號，唔知禾仔見到個心會點諗呢？我就好肯定呢件咁重口味嘅新產品一定滯銷，連我老竇係兵工廠迷，睇完之後都係咁擰頭。
廠褲利記外套最爆
另一件同樣嚇親我嘅，就係成個晏菲路球場燙畫喺面、賣40鎊（約488港元）一件嘅利物浦外套，五顏六色花哩花碌咁，但就可以反轉入面嚟着，我求大俠好有興趣知入面會唔會好過出面。不過，我老竇同我睇法又唔同，覺得件外套有啲軍佬feel，我就建議送畀一啲勇於接受新事物嘅「潮爸」啦！
曼聯剃鬚刀夠實用
至於最老正，就梗係曼聯嘅剃鬚刀，雖然冇乜特別，但就勝在啱用，老竇係曼聯球迷嘅，呢份禮物必備！但講到靚，就梗係車路士嘅藍色多士爐同暖水壺，送出來又夠晒大體。至於《每日郵報》為熱刺球迷挑選嘅父親節禮物最有心思，就係潤唇膏一支，上季球隊踢到咁辛苦，創下球會喺踢英超以來最高嘅72分，都攞唔到前4，送支潤唇膏滋潤吓啲球迷就啱晒啦！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange