【本報訊】年輕人衝動犯錯，浪子回頭往往只欠一個機會。有90後年輕髮型師沉迷打機，上班無精神被老闆責備，竟以粗口回敬，更不惜毀約劈炮，結果被入稟追討違約金。幸而老闆知他本性不壞，亦欣賞他勇於承擔責任，願意給予機會再次聘用，由「洗頭仔」從頭做起，「如果唔係番咗嚟，𠵱家可能仲係無所事事」。
記者︰袁樂婷
前年畢業後於旺角匠髮廊打工的Ocean（18歲），因工作落力獲老闆賞識，不足一年便正式成為髮型師，前途無限。但他後來「貪玩」通宵打機，「唔夠瞓成日做漏嘢」，有次老闆出言責備，「躁起上嚟用粗口鬧番佢轉頭，鬧完掉頭就走」。
當時Ocean與髮廊尚有九個月合約，離職要賠足九個月糧。老闆多次勸說不應任性行事，他卻當是耳邊風。後轉職侍應和裝修工人均做不長，「覺得辛苦同唔啱自己，情願冇錢賠都唔番工」。去年初老闆終告上小額錢債審裁處追討違約金。
「佢好有心機對啲客」
他憶述，老闆知他一直未有穩定工作，三個月後致電邀請他回巢，「冇諗過咁衰仔都仲肯畀機會我」。Ocean自知「唔生性」，感激老闆包容，決心改過自新報答老闆，現時已由「洗頭仔」再次升為髮型師，每月扣除部份薪水償還違約金。
匠髮廊執行董事梁國華說，不會縱容員工，但只要有心改過及願意承擔責任，便會給予機會。Ocean本性不壞，只是年少氣盛，「佢好有心機對啲客，唔會因為畀少貼士就對你衰啲，見到佢唔係勢利嘅人；佢亦知自己錯乜，勇敢認錯」，因此原諒Ocean。但他不諱言，並非所有人都這麼幸運，有第二次機會，籲年輕人慎行。
智經研究中心昨舉辦論壇，探討商界如何協助弱勢社群。社聯行政總裁方敏生指，商界角色舉足輕重，不一定局限於捐款，建議政府支援及鼓勵中小企參與地區義務工作。香港總商會常務副主席彭耀佳則指「賺錢唔一定係壞事」，商界首要保持競爭力，才有資源提供更多實習及就業機會；企業盈利亦可穩定政府稅收，幫助有需要人士。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange