無疑，這一刻是屬於鄭文雅（Olivia）和南極企鵝的。他們相遇對望，這麼近但那麼遠，近者，是幾乎伸手便可觸碰；遠者，是Olivia歷盡驚濤駭浪，嘔盡黃膽水才能踏足南極。不過，相比起企鵝每天面臨大自然所帶來的威脅，Olivia的苦楚只是微不足道。Olivia希望透過這段旅程，向世人傳達環保訊息，比純粹到訪南極，任更重、道更遠。
撰文：黃曉妍
鄭文雅與老公及14位朋友於去年聖誕至今年農曆新年到南極旅行，拍下很多美麗照片，回港細味照片之際，突然想到希望為南極和環保出分力，於是精挑細選部份相片，現正假會展旅遊博覽舉行為期四天（明天結束）的個人攝影展「南極自在觀」，以及推出1,300本限量版和普通版的攝影集籌款，籌得的善款將捐往South Georgia Heritage Trust作生態保育之用，並支持李樂詩博士籌辦香港「極地博物館」。今次Olivia在旅遊博覽舉行的攝影展，亦是該博覽首次有個人名義參展。
提到南極之旅，Olivia表示十分艱苦，一行16人由阿根廷最南面的港口Ushuaia（烏斯懷亞）登船出發，先往福克蘭群島，再到South Georgia島，然後向南極前進，她說：「當我哋由South Georgia島去南極嘅時候，遇到低氣壓形成嘅颱風，風力有50海里，正面吹向我哋，我哋架船有六層高，但啲浪已經拋到四層高，我當時諗『我成世人唔坐船，一坐就俾我撞到』，其實我哋已買咗幾份保險，我仲帶埋十字架去，上船永遠唔知發生乜嘢事，幾年前沉過一架船，正正就係我哋呢條航線。」
「黃膽水都嘔埋」
面對驚險旅程，Olivia坦言只能順天而行：「咁多年我都唔肯去南極，就係知有船沉過，有人坐飛機去又跌過落嚟，今次肯去，真係諗咗好耐，我連去澳門、中山都會暈船浪，但朋友說服我同我老公，話呢艘法國船係新設計，有新式穩定器，就算好大浪都唔會太搖；不過我哋喺船上二樓食飯，窗外係浪，好似喺海底食緊飯，後嚟一個浪冚嚟，所有枱凳走晒位，當時我乜都唔諗，成日去旅行，覺得意外就係天意，點避都避唔到，我哋對死亡已睇得好開。」
容易暈船浪，對Olivia來說實在很辛苦，縱使船上生活好食好住，每天都會提供香檳，但Olivia卻暈倒嘔吐，食不下嚥，每天只能吃點雞粥度日：「我冇肥到，直情連黃膽水都嘔埋，影相仲暈，相機同船一齊搖，影兩下已經暈，真係慘，呢輯相真係得嚟不易。」
分流登岸觀企鵝
在船上，Olivia向天仰望，又暗又黑的天色極影響心情，Olivia說：「好灰，根本唔知去唔去到南極，出發前講明唔擔保我哋一定去到，一切以安全為大前提。」在船上足足捱了11天，Olivia與老公及朋友終於成功抵達南極，除Olivia等16位乘客外，同船還有15位探險家，由他們作先行部隊登上南極探路，當Olivia上岸後，望着眼前一切，喜悅心情湧上心頭：「嘩！真係好開心！」
為免影響南極生態環境，每次只准100人上岸，只可逗留個半小時，故須分流式上岸，依指示走，外來者切勿攜帶外來的東西登陸南極，跟島上所有生物要保持15呎以外的距離，Olivia說：「怕人類有菌，我哋每次都要將鞋擦得好乾淨，然後消毒先可以落船，上船又係咁樣做法，因為可能踩到企鵝排泄物，又或者擔心南極有乜嘢菌帶咗返去，呢樣嘢好緊要，執行得好嚴格。」
Olivia形容南極是一個沒有彩色的地方，就連海都是黑色，她說：「我哋向企鵝島嘅火山口行，但我想睇企鵝，於是向海邊行，喺雪坡上見到一隻企鵝，突然間我感覺佢好似一個女神，中國人講嘅觀音，覺得佢好靚，好慈祥，幾秒鐘佢就走咗，好彩我本能反應即刻影咗。」這隻企鵝亦成為攝影集的封面主角。南極的夏天只有兩、三個月，企鵝就在這時上水拍拖、結婚及繁殖下一代，Olivia說：「呢個時候企鵝最危險，海獅會食企鵝，鳥類又會食企鵝ＢＢ，所以企鵝孵蛋會望嚟望去，直至企鵝ＢＢ大少少，全部企鵝就會落水，南極冬天就開始。」
因果循環倡環保
企鵝的偉大，令Olivia希望為牠們做點事，亦將體驗向大家分享：「企鵝ＯＫ，人類就ＯＫ，呢個係循環，例如海水暖，關人乜事，其實海水溫度升高一度，整個海水酸性會增加，珊瑚即死，圍繞珊瑚生活嘅魚即死，大魚冇嘢食都死，人開始冇嘢食又死，整個循環好重要，大家應該要宏觀去睇，所以我去完南極宏觀好多。」講到宣揚環保意識，Olivia此行見到很多鯨魚、殺人鯨的骸骨，聽說劏開鯨魚肚後，發現入面有好多氣球，她說：「原來我哋放氣球上天，最終會落晒個海，鯨魚食嘢係擘大個口就食，我去完南極先知，返嚟同人講，唔好玩氣球。」她還呼籲大家減少隨身物，續說：「我去咗兩個月，帶咗一個皮篋、一個背囊、相機，我咪咁樣生活咗兩個月，所以返到嚟，我覺得屋企有好多無謂嘢，於是清書大行動，捐去學校圖書館，跟住清衫、清高爾夫球棍，我又同波友、學生講，波棍唔好當垃圾丟，應該捐出嚟畀初學者循環再用，又多電子產品，都唔知點搞，好慘！」
場地提供：Hooray Bar & Restaurant
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange