日本沙排女神淺尾美和一向有「沙灘仙女」同埋「沙灘妖精」嘅稱號，係日本體育界出晒名嘅靚女，更係宅男界嘅女神。可惜佢日前被爆出喺4月同「素人男友」拉埋天窗，傷盡唔少宅男嘅心。
女神都係女人，27歲嘅淺尾美和喺舊年12月宣佈引退時，已經透露自己心入面有一位「好重要嘅人」，仲甜絲絲話以結婚為前提而交往中。雖然外表清純，但淺尾美和嘅情史同緋聞都唔小嘢，曾經同過前日本奧運足球隊隊長、現效力日聯廣島三箭嘅水本裕貴拍拖，仲被爆初夜不保。
樣靚做藝人仲掂
作為「日本最美沙灘女王」嘅淺尾美和，長相甜美，身高1米72，吸引咗唔少沙排球迷。高中畢業之後就跟同係打排球出身嘅日本藝人川合俊一簽約，發展起沙排、模特兒、演藝嘅三棲事業。但好多沙排迷都話，沙灘女王喺沙排嘅表現比起佢嘅Bikini同廣告事業，簡直不值一提。簡單啲講，偶像派不嬲好難同實力並存㗎啦。
曾與日本蛙王傳緋聞
人紅自然多新聞，呢位玩過08年京奧嘅沙排女王，曾喺自己個Blog度，隨便表達吓對日本蛙王北島康介嘅傾慕：「北島選手真係好勁！連續兩屆奪冠，堅型嘞！」咁就喺當年奧運期間捲起一場桃色小風波，立即傳出佢同北島康介嘅緋聞。女王最認真嘅戀情，應該係俾記者影到同水本裕貴撐枱腳，佢甚至不避嫌現身大阪飛腳（水本當時效力嘅球會）嘅球場睇波。當時仲傳出一直保持清純形象嘅淺尾美和，將初夜獻咗畀水本，令男fans流咗唔少眼淚。
不過，𠵱家嘅淺尾美和相信已經搵到屬於女王嘅幸福，睇佢經常上節目笑咪咪大講甜蜜感情生活就知啦。當俾電視節目主持人問到老公係草食系抑或肉食系，佢就大爆從事服務行業嘅老公好wild，而且係佢心目中最型嘅男人㖭！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange